МАН шөнөжин хуралдаж, хамтарсан Засгийн газар ханаа буулган, таран одох нь тодорхой болсон энэ цаг үед албан бус эх сурвалжууд МАН-ын генсек Я.Содбаатарыг Ерөнхий сайд болно хэмээн шуугиж байна цаагуур чинь... Өмнө бичсэнчлэн МАН доторх бүлэглэлүүдийн “зодоон” ахмадуудын ялалтаар өндөрлөв бололтой. Монгол төрийн эрх мэдэлд үе шилжилт буюу генерацын үйл явц засгаас шахагдсан ахмад МАН-ын санхүүжүүлэгч бүлэглэл, залуу МАН-ын бүлэглэлийн хоорондох хурцадсан сөргөлдөөн энд хүрээд өндөрлөлөө. Ахмадууд нь давамгайлсныг УИХ-ын дарга Д.Амарбаясгалангийн хэлсэн үг нотлоод өгнө. Тодруулбал мань эр өчигдөр Бага хурлын завсарлагааны үеэр сэтгүүлчдийн өмнө “Би Л.Оюун-Эрдэнийн талд байгаа” хэмээн байр сууриа ил тод хэлсэн.  

Сөргөлдөөн залуу МАН-ын давамгайллаар өндөрлөөсэй гэж хүсэж байсан юмсан. Ашиг сонирхлын хил хязгаараа тохиролцож чадаагүй учраас ахмадууд нь арай олонх учраас хамтарсан Засаг бутарч, хариуцлагагүй тэнэг гэх хочийг АН хүртээд тоглоом дуусаж байх шиг… Л.Оюун- Эрдэнэ жагсаалаар тодорч, жагсаалаар огцров хэмээн улс төрийн түүхэнд бичигдэх нь баараггүй. Гэвч дараагийн Ерөнхий сайдаар албан бусаар тодроод буй Я.Содбаатараас мега төслийн үргэлжлэл, ирээдүйн сайн сайхныг хүсэн хүлээх нь унжаад байхаар унаад ирээсэй гэдгийн үлгэр болох биз.

Байгуулсан гавьяагүй ч бараг гэрлийн хурдаар бусдын хүчээр дээшлэх эл эрхэм уурхайтай болохыг санаархаж, ЖДҮ-г зайдагнаж, төрийн албыг төрлийнх болгоход багагүй хувь нэмэр оруулсан нэгэн. Азтай гэх үү, аль эсвэл татаас нь лут гэх үү… Ямартай ч хууль эрх зүйн үүднээс намын дарга Л.Оюун-Эрдэнэ Ерөнхий сайдын ажлаа өгснөөр МАН-ын дараагийн том дарга Я.Содбаатарын Ерөнхий сайд болох зам цэлийтэл нээгдлээ. Хатуухан хэлэхэд, төрийн ажлыг төрлийнх болгохдоо гарамгай мань эр түмний төлөө Засгийн газрыг ажиллуулна гэдэг юу л бол…Тулаанд шонхорууд нисч, эрх мэдэл, албан тушаалд болжморууд жаалдаг цаг ч юмсан уу?