МАН-ын Бага хурал эхэлж байна. Хэдийгээр хурал болох цагийг 15 хэмээн зарласан ч 16,20 минутад хурал эхлээгүй л байлаа. Зарим хүмүүс Ерөнхий сайдын хүүгийн тансаглал Засгийн газар огцрох шалтгаан боллоо хэмээн сэтгэж байвал том андуурал шүү. Тоглоом гэж нэрлэж болдог бол эхний шат нь ихээ эрт эхэлснийг сануулчихая.

Басхүү УИХ дахь МАН-ын бүлгийн гишүүд, Засгийн газрын гишүүд "Хамтарсан Засгийн газар үргэлжлүүлэн ажиллах ёстой" гэх байр суурийг түлхүү илэрхийлж байгаа бол Бага хурлын зарим гишүүн "МАН дангаараа Засгийн газраа байгуулан ажиллах нь зөв" гэдэг байр суурийг илэрхийлж буй. 

Жижигхэн онолдчиход, өнөөгийн улс төрийг практик арга зүйн үүднээс БОДЛОГО, БҮЛЭГЛЭЛ, ТЭМЦЭЛ, ХӨЛС-ний улс төр хэмээн ангилдаг. Эдийн засаг, нийгмийн асуудлын шийдэлд баримжаалсан үзэл баримтлалд суурилсан улс төрийг БОДЛОГЫН улс төр гэдэг бол БҮЛЭГЛЭЛИЙН улс төр гэж санхүү, бизнесийн бүлэглэлүүд харьяаллын улстөрчдөөрөө дамжуулан эрх мэдлийн мэдлийн төлөө тэмцэлдэхийг хэлдэг.

Харин ТЭМЦЛИЙН улс төр гэж парламентын гаднах сөрөг хүчнийг хэлдэг бол ХӨЛСНИЙ улс төр гэдэг захиалгат акцийн гүйцэтгэгчид юм. Гарын үсгийн акциар эхлэж, жагсаалаар үргэлжилж буй үзэгдлийн наадтай  утаа, угаар, дарга нарын хүүхдүүдийн тулгуур хийсэн ч цаадтай нь цаг хугацааны хувьд далд цаанаа өөр асуудалтай холбогдож байгааг анзаарах учиртай. 

Уг далд асуудал нь нэгдүгээрт Гашуун сухайтын Төмөр замын холболтын БНХАУ, Монгол Улсын Засгийн газар хоорондын гэрээг үзэглэх арга хэмжээ, хоёрдугаарт 14 стратегийн ордын 34-өөс 51 хувийг баялгийн санд төвлөрүүлэх ажил юм. Ухаа худаг, Цагаан суварга тэргүүтэй стратегийн ордуудыг эзэмшигч МСS, МАК зэрэг компаниуд өдгөө засгийн эрхээс шахагдан гарсан МАН-ын ахмад үеийг санхүүжүүлж ирсэн нь нууц биш. Харин Л.Оюун-Эрдэнэ, Л.Амарбаясгалан нарын тэргүүлсэн Залуу МАН энэ санхүүжилтээс татгалзсан нь бас үнэн. 

Тэгвэл залуу МАН-ын бүлэглэл санхүүгийн хувьд ямар эх үүсвэрт тулгуурлах вэ… Таван толгой дахь Бор тээгийн орд уу. Халзан бүрэгтэйн газрын ховор элементийн орд уу гэх мэт олон асуудал ирэх жилүүдэд биднийг хүлээж байна. Энэ бүгдээс харахад Монгол төрийн эрх мэдэлд үе шилжилт буюу генерацын үйл явц засгаас шахагдсан ахмад МАН-ын санхүүжүүлэгч бүлэглэл, залуу МАН-ын бүлэглэлийн хоорондох хурцадсан сөргөлдөөнөөр үргэлжилж байна. Сөргөлдөөн залуу МАН-ын давамгайллаар өндөрлөх үү, аль эсвэл ашиг сонирхлын хил хязгаараа тохиролцсон зөвшилцөлд хүрэх үү гэдгийг харж л байя… Хурал ч шөнөжингөө үргэлжлэх байх даа. Сануулахад, МАН-ын Бага хурал 300 гаруй гишүүнтэй. Ирц 50 хувийн босго давж байж хурал эхлэх учиртай билээ л...

Сэтгүүлч Ч.ГАНЗОРИГ