Засгийн газрын өнөөдрийн /2025.05.21/хуралдаанаар Нийтийн албан тушаалтны хөрөнгө хураах тухай хуулийн төслийг хэлэлцэн, УИХ-д өргөн мэдүүлэхээр болсон. Тодруулбал, Засгийн газар өнгөрсөн нэгдүгээр сарын хуралдаанаар Нийтийн албан тушаалтны хөрөнгө хураах тухай хуулийн төслийг дэмжиж, УИХ-д хүргүүлсэн. Энэ нь зөвхөн хөрөнгө хураах тухай зохицуулалт биш авлигын эсрэг багц хуулийн төсөл юм байна. Эрүүгийн хэрэг хянан шийдвэрлэх тухай, Цагдаагийн албаны тухай хуульд өөрчлөлт оруулах зэрэг олон хуульд өөрчлөлт оруулах төсөл байгаа гэсэн үг.

Гэвч УИХ энэ цагаас хойш тов өгөөгүй тул хэлэлцүүлж чадалгүй олон сар өнгөрсөн билээ. Тиймээс Засгийн газар өнгөрсөн даваа гаригт хуулийн төслөө татаж аваад зохих өөрчлөлт хийгээд өнөөдрийн Засгийн газрын хуралдаанд оруулж, УИХ-д дахин өргөн мэдүүлэхээр болсон нь энэ.
Энэ хуулийн төслийг нийтийн албан тушаалтны хууль бус хөрөнгийг иргэний журмаар хураан авч, нөхөн төлүүлэх тухай гэж өөрчилсөн байна. Мөн субьектуудыг нь төрийн өндөр албан тушаалтнуудаас эхлэх байдлаар өөрчилжээ.

Өөрөөр хэлбэл, 2002 оноос хойш эрүүгийн хэрэгт яллагдагчаар татагдаж байгаад шалгагдаж өршөөгдсөн, шүүхээр ороод авлигын хэрэгт ял авсан атлаа хөрөнгөө хураалгаагүй, эрүүгийн хэрэгт буруутгагдаж, шүүхийн шийдвэр гараагүй боловч хөрөнгөө тайлбарлаж чадахгүй хүмүүсийн хөрөнгийг шүүхээр хураана гэсэн үг. Гэхдээ иргэний шүүхийн журмаар хураадаг болно гэсэн үг. Түүнчлэн хорих ял оруулаагүй бөгөөд ял шийтгэлгүй, хөрөнгө нь хураагдана гэж ойлгож болно.

Хууль санаачлагчийн зүгээс хэргийнх нь хөөн хэлэлцэх хугацаа нь дууссан зүйлүүд дээр ял шийтгэл ярих бололцоогүй байгаа учраас олон жилийн өмнө  хөрөнгө завшсан, хууль бусаар хөрөнгөжсөн хүмүүс санаа сэтгэл амар яваад ирснийг  өөрчлөх гэж хуулийг санаачилсан хэмээн онцоллоо.