МАН-ын Ерөнхий нарийн бичгийн дарга Я.Содбаатар Архангай аймгийн Цэцэрлэг хотод 1974 онд төрж, Өвөрхангай аймгийн Хархорин сумын ерөнхий боловсролын сургуулийг 1992 онд төгссөн. Дунд сургуулиа төгсөөд Технологийн дээд сургууль, Удирдлагын академи, МУБИС-ийг дүүргэсэн доктор хэргэмтэй нэгэн. Шинжлэх ухааны академийн харьяа Дулаан техник, үйлдвэр, экологийн хүрээлэнд эрдэм шинжилгээний ажилтнаар ажлын гараагаа эхлүүлж, Монголын Ардчилсан Залуучуудын социалист холбооны Нарийн бичгийн дарга, II ерөнхий нарийн бичгийн дарга, Үйлдвэр худалдааны сайдын зөвлөх, Мэргэжлийн хяналтын ерөнхий газрын дарга, Монгол Ардын намын Нарийн бичгийн даргаар ажиллаж байгаад намын нэрсийн жагсаалтаар 2012 онд Монголын парламентын босгоор давснаар их улс төрд нэр нь сонсогдох болсон нэгэн.

Хатуухан хэлэхэд  УИХ-ын гишүүн болохдоо бусдынхаа авсан санал дээр дөрөөлж гишүүн азтай нэгэн. Төрийн түшээ болоод тун удалгүй Зам, тээврийн хөгжлийн сайдаар томилогдсоноор зам нь шулуурсан ч гэж хэлж болох. Ямартай ч нэгэн үе өнөө алдартай Жижиг, дунд үйлдвэрлэлийг хөгжүүлэх санг цөлмөгсдийн нэг гэж учир мэдэх хүмүүс ярьдаг.

Тодруулбал, танил тал хамаарал бүхий компаниараа дамжуулан уг сангаас нэг тэрбум 200 сая төгрөгийн зээлийг 2018 оны зургаадугаар сарын 14-ний өдөр жилийн гурван хувийн хүүтэй авсан нь баримтаар нотлогддог. Тиймдээ ч мань эр сайдын суудлаа өгч, 2016 оны сонгуульд нэр дэвшилгүй үлдсэн бөгөөд ЖДҮХС-гаас авсан зээлээ хугацаанаас нь өмнө эргүүлэн төлсөн нь архивын хуудсанд тэмдэглэгдэн үлдсэн.  За тэгээд Үйлдвэр худалдааны дэд сайд байхдаа буюу 2007 оны үеэс л Шивээ овоод нүүрсний лиценз гаргаж байсан түүх ч бас түүнийх. Гэхдээ эл хүмүүнийг одоогийн Ерөнхийлөгч У.Хүрэлсүхтэй нийлж Шинэ шивээ төслөөр нүүрсний уурхай эзэмших гэсэн шунал бүтэлгүйтснийг тодхон санаж байна. 
 

Хатуухан хэлэхэд улс орон ард түмэнд бүү хэл МАН-д ч байгуулсан гавьяагүй эл эрхэм өдгөө МАН-даа бол хоёрдогч хэмээгдэн генсекийн суудалд тухалж буй. Хэдийгээр МАН-ын генсек гэдэг хариуцлага, хал хоёр нь хэтийдсэн алба ч гэлээ Янгүгийн хүүд ямар ч асуудалгүй "зөөлдөөд" л байгаа сэнтий. Шулуухан хэлчихэд бусдын ялалт дээр явж л байдаг эл улстөрчийг яг хэн татаж чангааж өдийг хүргэснийг дараагийн удаа бичиглэе.

Үргэлжлэл бий.