2024 оны УИХ-ын сонгуулийн үр дүнгээр парламентад МАН 68, Ардчилсан нам 42, ХҮН 8, Үндэсний эвсэл 4, Иргэний зориг ногоон нам 4 суудалтай болсон. Улмаар сонгуулийн өмнө тохирсон тохирооны дагуу олонх болсон МАН-аас бусад намдаа санал тавьж хамтарсан Засгийн газрыг байгуулан ажилласаар өнөөдрийг хүрсэн. Алсын хараагаараа ард түмнээс “кок” үнэлгээ авсан Л.Оюун-Эрдэнийг хамтарсан засаг байгуулахад нь гох дэгээнээс зайлсхийж, бат бөх суурьтайгаар засгаа байгуулахыг зорьж дээ гэж дүгнэгсэд олон байлаа. Басхүү олон намын ая занд тааруулан хэтийдсэн данхгар бүтэцтэй болгочихлоо гэж шүүмжлэгсэд ч цөөнгүй байсан. Эхлэл нь дүн өвлөөр тавигдаж, ганхуулж унагах овт мэхэнд ороогдсоор хүйтнийг давсан ч Л.Оюун-Эрдэнээр овоглогдсон одоогийн Засгийн газар нуран унах нь өнөө маргаашийн л хэрэг болчих шиг боллоо.

Том хүүгийнхээ сүйт бүсгүйн бөгжнөөс болж, бүдчих болсон засаглалын нуралт өнөөдөр хурдлуулах араандаа оров. Эх сурвалжийн өгүүлснээр Ерөнхий сайд Л.Оюун-Эрдэнэ улс төрийн нөхцөл байдалтай холбоотойгоор МАН-ын Удирдах зөвлөл, бага хурлыг хуралдуулж, хамтарсан Засгийн газрын үйл ажиллагааг үргэлжлүүлэх эсэх асуудлыг хэлэлцүүлэх санал гаргажээ.

Товчхондоо, хамтарсан Засгийн газраас ХҮН болон Ардчилсан намыг гаргах шийдвэрийг МАН-ын шат шатны байгууллагаар гаргуулж, 100 хувь МАН-аас бүрдсэн Засгийн газрыг байгуулах төлөвлөгөөгөө танилцуулсан гэсэн үг. Би үхэхээр ч чи үх гэдэг арга л даа.

Гэвч Ерөнхий сайдын байр суурийг МАН-ын бүлгийн хаалттай хуралдаанд оролцсон гишүүдийн олонх эсэргүүцсэн бөгөөд хувь хүний асуудлыг намын асуудал болгож улмаар парламентад нэр заах нь улс төрийн хувьд боломжгүй зүйл тул ёс суртахууны хариуцлага хүлээх ёстой хэмээн зарчмын зөрүүтэй санал гаргажээ. Харин дараа нь Ерөнхий сайдын өрөөнд УИХ-ын дарга Д.Амарбаясгалан, Ерөнхий сайд Л.Оюун-Эрдэнэ, Шадар сайд С.Амарсайхан, Ерөнхийлөгчийн Тамгын газрын дарга Г.Занданшатар, УИХ дахь МАН-ын бүлгийн дарга Л.Мөнхбаатар нарын уулзсан. Уулзалт нэгдсэн ойлголт хүрээгүй нь тодорхой болсон.Уулзалтаас гараад Ерөнхий сайд Л.Оюун-Эрдэнэ Ерөнхийлөгч У.Хүрэлсүхтэй уулзжээ. Ерөнхийлөгч У.Хүрэлсүх Ерөнхий сайд Л.Оюун-Эрдэнэд "Өөрөө ажлаа өг" гэж товчхон хариу барьжээ.