Дэггүй моньдоос ганц боллоо гэдэг шиг манай Ерөнхий сайдын суудлыг ганхахад хүргэх гох дэгээ нь төрсөн хүү нь байх юм гэж хэн саналаа. Сүйн бөгжнийхөө үнээр сөхөрч буй ард иргэдээ ангайлгаж, атаархуулсан том хүүгийн дэгдээсэн шуугиантай зэрэгцэн дараагийн ээлжийнхэн хоолондоо орохоор даанч яараа давчуу бужигнаж эхэлжээ. Бужигнаан дунд ерөнхийд горилогчдын нэрс ч ил цагаан сонсогдох болсон. Заримдаа ч дур эзнээ голохгүй гэдэг шиг нөхдийн нэр тууж явах юм билээ. Угтаа хөхөө өвлийн хүйтэнд цэрэг залуугийн ар гэрийнхэн бүлээрээ угаартаж нас барах үест л засгийн замналыг саатааруулах эхлэл тавигдсан. Золгүй явдлыг олны дүйвээн болгож, Засгийн газар огцрох шалтгаан болгон хувиргасан нь өдгөө талбай дээр “ОГЦРОХ АМАРХАН” жагсаалаар үргэлжилж байна. 

Өнөөдрийн байдлаар нэр дэвшигчдээс хамгийн өндөр магадлалтай нь УИХ-ын дарга Д.Амарбаясгалан, дараа нь Н.Учрал хэмээн улс төр судлаачид онцолж буй. Д.Амарбаясгалангийн тухайд МАН-ын түүхэнд хамгийн олон жил генсекээр ажилласан нэгэн. Тэр утгаараа намын залуусын дунд нэр хүнд зангараг өндөртэй нь маргашгүй үнэн.

Харин Н.Учралын хувьд ураны асуудлыг шийдэх түүхэн үүргийнхээ улмаас Ерөнхий сайдын суудал руу дөхөх алхмаа даруй гурван шатаар ахиуллаа. Тодруулбал, Засгийн газрын хэрэг эрхлэх газрын дарга Н.Учрал Монгол-Францын Засгийн газар хоорондын комиссын хуралдаан 11 жилийн дараа Парис хотноо болоход Францын талыг Европ, Гадаад хэргийн яамны Ерөнхий нарийн бичгийн дарга, хатагтай Анн-Мари Дэкот тэргүүлж, Монголын талыг ахлан ажилласан юм. 

Энэ хүрээнд Дорноговь аймагт олон улсын итгэмжлэгдсэн лаборатори байгуулсны дараа ураны төслийг үргэлжлүүлэх саналыг Францын талд тавьж, харилцан тохиролцож чадсан байна. Өөрөөр хэлбэл, хүн, мал, амьтан, байгаль орчны эрсдэлийг орон нутагт нь дэлхийн түвшинд шинжлэн судлах боломж бодитой болно гэсэн үг. Монгол Улсын Засгийн газар БНФУ-ын “Орано майнинг” компанитай ураны төслийн хөрөнгө оруулалтын гэрээнд энэ оны нэгдүгээр сарын 17-ны өдөр гарын үсэг зурсан. Ингэснээр олон жил гацсан ураны хөрөнгө оруулалтын төсөл хөдлөх болсон. Харин гэрээ зурагдахтай зэрэгцээд Монголын иргэний нийгмийн байгууллагууд ураныг шинжлэх олон улсын лаборатори байгуулах шаардлагыг тавиад байсан бол улмаар Монгол Улсын Засгийн газар олон улсын жишигт нийцсэн лаборатори байгуулах, иргэдийн хяналтын зөвлөл байгуулах шийдвэрийг гаргасан нь ийнхүү биеллээ олж байна.

Дэлхийн зах зээлд ураны үнэ өсөн нэмэгдсээр буй энэ цагт ажил хэрэг болговол аштай тустай төсөл. Ардын нэр барьсан хийрхэгчдийг шинжлэх ухаанчаар хязгаарлах боломж мөн. Мэдээж шууд утгаараа Н.Учралын рейтинг суга өснө. Тэгэхээр Ерөнхий сайд унаад оронд нь тухлах хүн Н.Учрал байж болох уу гэх асуулт гарч ирнэ. Товчхондоо Л.Оюун-Эрдэнэ унаж, Н.Учрал оронд нь суувал яах вэ гэх асуулт гижиг хүргээд байгаа юм.

Засгийн тэргүүн огцорсноор Засаг шинэчлэгдэнэ. Гэхдээ 100 хувь шинэчлэгдэх нь юу л бол. Шилэгдэж гологдоод зарим нь үлдэнэ. Шинэчлэлийн ширүүн давалгаанд хамгийн түрүүнд өртөх хүн бол Зам тээврийн сайд Б.Дэлгэрсайхан. Давалгаанд өртөх боломжоо даамай сайн хангаж, нөхцөлөө бүрдүүлсэн нь бодит үнэн.

Мань эрийн хамсаатан улсын харцага Г.Ганхуяг өдгөө хэцүү нэртийнд сууж буй. Түүнийг Тагнуулын байгууллагаас баривчилж, ШШГЕГ-ын харьяа Урьдчилан хорих 461 дүгээр ангид цагдан хориод сар гаруйн хугацаа өнгөрсөн. Түүнийг хойшлуулшгүй ажиллагаа явуулж саатуулсан бөгөөд хорих хугацааг нь ахин 30 хоногоор сунгаад буй.

Эх сурвалжийн өгүүлснээр мань эрийг Эрүүгийн хэрэг хянан шийдвэрлэх тухай хуулийн 14.9 дүгээр зүйлийн 1 дэх хэсгийн 1.3 дахь заалтаар буруутгаж байгаа юм билээ. Тодруулбал, уг хуульд “хүний амь нас, эрүүл мэнд, эд хөрөнгөд хохирол учруулах, эсхүл оргон зайлах, эсхүл хэргийн ул мөр, эд мөрийн баримт, нотлох баримтыг устгах, өөрчлөх, зөөвөрлөх, нуун далдлах, үрэгдүүлэх, хуурамчаар үйлдэх, гэмт хэрэг үйлдэх, гэмт хэргээ төгсгөх үндэслэл бүхий баримт, мэдээлэл байгаа” гэж хуульчилсан байдаг.  Шуудхан хэлчихэд мань хүн ЗГХЭГ-ын дарга Н.Учралыг удаа дараа сүрдүүлсэн гэх сураг бий.

Босоо хөх Монгол ТББ-ын тэргүүн гэгддэг Г.Ганхуягийн гар хөл гэгдэх Дорноговь аймаг дахь салбар зөвлөлийн тэргүүн Н.Хэрлэн гэгч бий. Тэд уурхайчдыг дарамтлан, хууль бусаар хөрөнгөждөг тухай нутгийнхан нь хэлдэг. Тэднийг Зам тээврийн сайд Б.Дэлгэрсайханыг "том ахаа" хэмээн дууддаг мафижсан "дээрмийн бүлгийн"дээлтэй төрсөн дүү нар гэдгийг ч бас хэлдэг…

Үргэлжлэл бий.