Ховд аймгийн МАН албан ёсоор мэдэгдэл гаргалаа. 

Мэдэгдэлд: 
Ховд аймгийн МАН-ын 41 дүгээр Бага хурлын хуралдаан 2025 оны 2-р сарын 22-ны өдөр товлосон хугацаандаа эхэлсэн. 

Хуралд УИХ-ын гишүүн Э.Болормаа, С. Бямбацогт, З.Мэндсайхан, МАН-ын нарийн бичгийн дарга Н.Энхбаатар, Хяналтын Ерөнхий хорооны дэд дарга бөгөөд Ёс зүйн хорооны дарга Б.Баттүшиг, Хяналтын Ерөнхий хорооны гишүүн Б.Батзаяа, Ховд аймгийн МАН-ын Хяналтын хорооны 6 гишүүн болон МАН-ын Цахим хөгжил, инновацын газрын ажилтнууд оролцсон. 

2025 оны 1-р сарын 20-ны өдөр Намын тэргүүлэгчдийн хурлаас баталсан Бага хурлын төлөөлөгч сонгох журмын дагуу сонгогдсон болон квотоор оролцох нийт 263 төлөөлөгчийн нэрс Намын ажлын албанд ирснээс 6 төлөөлөгчийн мандат Багийн хурал дахин хийгдээгүй, цахим бүртгэлийг нөхөж хийсэн, үндсэн дүрмийн 4.8 зөрчилтэй зэрэг үндэслэлүүдээр Ховд аймгийн МАН-ын Хяналтын хорооны тогтоолоор хүчингүй болсон. 

Бага хурлын хуралдааныг намын Бага хурлын гишүүн Ц.Цогзолмаа Ховд аймгийн МАН-ын дэд дарга Т.Дэлгэрсайхан нар Бага хурлын төлөөлөгчдөөс олонхын санал авч батлагдсан хэлэлцэх асуудлууд болон дэгийн дагуу удирдан явуулсан. 

Ховд аймгийн МАН-ын даргын сонгуульд Д.Авирмэд, Э. Алтан Од, М.Ганзориг, Т.Жаргалсайхан нар нэрээ дэвшүүлж мөрийн хөтөлбөрөө танилцуулан өрсөлдсөн. 
МАН-ын даргын сонгуулийн санал хураалт явагдаж Тооллогын комисс ажиллаж байх хугацаанд Бага хурлын төлөөлөгчийн мандат аваагүй Буянт сумын намын гишүүн Д.Мөнхболдыг Буянт сумын засаг дарга Д.Энхболд нь хуурамч буюу дахин хувилж, хэвлэсэн Д.Энхболд гэсэн мандатаар санал өгүүлсэн нь НОЦТОЙ ЗӨРЧИЛ цахим бүртгэлийн шалгалтаар илэрсэн. Гишүүн Д.Мөнхболд нь Д.Энхболдын мандатаар санал өгсөн гэдгээ хүлээн зөвшөөрсөн. 

Энэ ноцтой зөрчил үүссэнээр Тооллогын комисс тогтоол гаргах боломжгүй буюу Д.Мөнхболдын хуурамч мандат ашиглаж өгсөн саналыг аль нэр дэвшигчээс хасч тоолох нь нууц санал хураалтын зарчимд харшлах нөхцөл байдал үүссэн. Ийм зөрчлүүд өөр бусад хэлбэрээр үүссэн байхыг шалгаж нягтлах шаардлага үүссэн.

Иймд хуралдаан даргалагчид Бага хурлын хуралдааныг Тооллогын комиссын гишүүд, Ховд аймгийн МАН-ын Хяналтын хорооны гишүүд хэлэлцэж шийдвэрлэх хүртэлх хугацаагаар завсарлуулсан. Мөн аймгийн хяналтын хорооны гишүүд хяналтын тооллого хийх үйл явцыг заалнаас үймээн шуугиан тарьж хийлгээгүй. 

Гэтэл Бага хурлын төлөөлөгч Т.Баатарзориг болон УИХ-ын гишүүн С.Бямбацогт нар Бага хурлыг шөнө 04 цагт болон 2-р сарын 23-ны 11 цагт ирц бүрэлдээгүй буюу 30-60 төлөөлөгчтэйгөөр үргэлжлүүлэн Монгол улсын хууль журам, МАН-ын Үндсэн дүрмийг зөрчлөө. 

Ховд аймгийн МАН-ын зүгээс Буянт сумын Засаг дарга Д.Энхболдын дээр дурьдсан асуудлыг шалгуулахаар Цагдаагийн байгууллагад гомдол гаргасан бөгөөд мөн МАН-ын Хяналтын Ерөнхий хороонд гомдол гаргахаар бэлдэж байна.  

Ховд аймгийн МАН-ын 41-р хуралдаанаас ямар нэгэн албан ёсны шийдвэр гараагүй бөгөөд Бага хурлын төлөөлөгчдийг намын гишүүдийнхээ эв нэгдлийг хангаж МАН-ын Үндсэн дүрэм, Бага хурлын дэгийг мөрдөж ажиллахыг уриалж байна. 

ХОВД АЙМГИЙН МАН-ЫН ХОРОО
2025.02.23