УИХ дахь МАН-ын бүлгийн ээлжит хуралдаан өнөөдөр /2022.05.02/ боллоо. Хурлын дараа бүлгийн дарга Д.Тогтохсүрэн, УИХ-ын гишүүн, УИХ дахь Хүчирхийллийн эсрэг лобби бүлгийн ахлагч  Б.Баярсайхан нар мэдээлэл хийлээ.  

-Өнөөдөр нийгэмд тулгамдаад байгаа гол асуудалд бид дүгнэлт хийх цаг болсон-

Тэрбээр “Монгол Улсад Ковид цар тахал дэгдэхээс өмнө жилдээ 25 мянган хүүхэд ээж, аав, асран хамгаалагчийнхаа хажууд  гэмтэж, бэртэж, хүчирхийлэлд өртөж, амь насаа алдах тохиолдол ч гарч байсан. Энэ тоо Ковид цар тахлын үеэр 35 мянга болж өссөн. БСШУЯ, ЭМЯ, ХНХЯ, олон улсын байгууллагуудаас эцэг эхчүүдийн хариуцлагын талаар соён гэгээрүүлэх ажлыг хийдэг боловч өнөөдөр нийгэмд төдийлөн хүрэхгүй байна. Иймд, өнөөдөр нийгэмд тулгамдаад байгаа гол асуудалд бид дүгнэлт хийх цаг болсон. Сүүлийн үед нийгмийн сүлжээнд эцэг, эхчүүд анхаарлаа хандуулж, хүүхдүүдэд анхаарал тавихгүй байгаа нь судалгаанаас харагдаж байна.  Өөрөөр хэлбэл, бид хүүхдэд үл хайхрах хүчирхийллийг үзүүлж байна гэсэн үг. Хүүхдүүд бэртэж, гэмтэх, амь насаа алдсан хариуцлагын ард эцэг, эхчүүдийн хайхрамжгүй, хариуцлагагүй байдал нөлөөлж байна үзэж байна. Ийм учраас одоо хүчин төгөлдөр мөрдөгдөж байгаа Хөдөлмөрийн тухай хуулийн 43.3 дугаар зүйл заалтад Монгол Улсын нутаг дэвсгэр дээр үйл ажиллагаа явуулж байгаа аж ахуй нэгж, байгууллага, ажил олгогч болгон хүүхэд хамгааллын бодлоготой байна гэж тусгасан. Өнөөдөр бүх яамд, агентлагууд энэ заалтыг хэрэгжүүлэхээр хэлэлцүүлэг зохион байгуулж, ажиллаж байна. Дээрхи асуудалд эрх баригч МАН болон бодлого тодорхойлогчид онцгой анхааран ажиллаж байна” гэв.