Өнөөдөр буюу 27 жилийн дараа Монгол улсын Хүүхэд, залуучуудын театрын жүжгийн танхим 850 хүний суудалтай орчин үеийн техник, тоног төхөөрөмж бүхий шинэ барилга ашиглалтад оруулж, түүхэн мөчийн эзэд боллоо.

Нээлтийн арга хэмжээнд Монгол Улсын Ерөнхий сайд Л.Оюун-Эрдэнэ, Нийслэлийн Засаг дарга бөгөөд Улаанбаатар хотын захирагч Х.Нямбаатар, Соёлын яамны сайд Ч.Номин болон Сонгинохайрхан дүүргийн Засаг дарга Н.Алтаншагай, Сонгинохайрхан дүүргээс сонгогдсон зарим гишүүд, Нийслэл, дүүргийн ИТХ-ын төлөөлөгчид, Нийслэлийн нутгийн захиргааны удирдлагууд, Хүүхэд залуучуудын театрт ажиллаж байсан ахмад уран бүтээлч буурлууд, урлаг соёлын алтартнууд оролцсон юм. Театрын нээлт Төрийн шагналт, Соёлын гавьяат зүтгэлтэн Д.Батбаярын “Хайрыг хайрла” уянгын драмын жүжгээр хөшгөө нээж, танхим дүүрэн эрхмүүд болон ЕБС-ийн бяцхан сурагчид нижигнэсэн алаг ташилтаар хүлээн хүлээн авсан юм.

Тус театр нь 12,972 мкв талбай бүхий 3 давхар, 850 хүний суудалтай үзэгчдийн танхим, орчин үеийн стандартад нийцсэн дуу авиа, гэрэлтүүлэг механизм бүхий тайз болон дуу бичлэгийн студи, видео студитэй юм. Мөн үзэгчдийг ая тухтай үйлчлүүлэх нөхцөлийг бүрдүүлэхээр номын сан, кофе шоп, ресторан, хүүхдийн тоглоомын өрөө зэргийг тохижуулсан байна.Улсын төсвийн хөрөнгө оруулалтаар баригдсан Хүүхэд залуучуудын театр ийнхүү нээгдсэнээр нийслэлийн хамгийн их хүн ам төвлөрсөн буюу Сонгинохайрхан дүүргийн 330 мянган иргэн төдийгүй нийт Монгол улсын хүүхэд, залуучуудын оюуны хөгжлийг дэмжих, гоо зүйн боловсрол олгох нөхцөл бүрдлээ. Мөн хүүхэд, залуучууд дэлхийн театр, урлагийн хөгжлөөс суралцаж, сонгодог болон үндэсний урлагаа уламжлан хөгжүүлэх, уран сайхны бусад урсгал чиглэлийг танин мэдэх боломжтой болж байна. Ийнхүү өнөөдрөөс байнгын үйл ажиллагаагаа эхлүүлж буй Хүүхэд, залуучуудын театрт хүндэт үзэгч олон та бүхнийг урьж байна.