-Аймгийн Засаг дарга нар төслийн санаагаа гаргаад, өөрөө гэрээгээ хийгээд, өөрөө баталж, гарын үсэг зурах боломжтой болно гэсэн үг үү!-

Яг одоо УИХ-ын чуулганаар Төр, хувийн хэвшлийн түншлэлийн тухай хуулийн төслийг хэлэлцэж байна. Бизнес эрхлэгч ард түмнээс гадна улс төрийн бизнесменүүд энэ хуулинд нэлээд өндөр ач холбогдол өгч буй.

Тухайлбал, “Ажнай” Б.Бат-Эрдэнийг Өмнөговь аймагт хувийн бизнесээ цэцэглүүлж байгаа гэдгийг бүгд л хэлдэг. Тэгвэл тэрбээр хуулийн төслөөр дайруулж “Өмнөговийн бүтээн байгуулалт дээр Өмнөговьчууд маань  их хохирч байгаа. Бүх газар талхлагдаж байна. Эдний эрх ашгийг хайрлаж хамгаалах хэрэгтэй. Өмнөговьд  асуудал зогсоод байвал Монгол даяараа бүтээн байгуулалт, эдийн засагт хувийн хэвшлийнхнийгээ татаж оруулах  ажил зогсоно ” хэмээн хэлээд авлаа.

Үргэлжлүүлэн “Улс, засаг маань хэт их өртэй болсон энэ үед  Төр, хувийн хэвшлийн түншлэлийн хуулийг шинэчилж оруулж ирэх нь зөв. Гэхдээ хуулиндаа өнөөгийн Монгол улс, орон нутгийн онцлогуудыг харгалзах ёстой. Төр, хувийн хэвшлийн төлөөлөл гэчхээд хувийн төлөөлөл хаана байгаа юм. Хувийн хэвшлээ төсвийн бүтээн байгуулалтын ажилд оруулах хэрэгтэй. Концессын гэрээ гэж баахан хувийнхныгаа оруулчихаад сүүлд нь асуудал болов” гэв.

Ташрамд хэлэхэд, хуулийн төсөлд орон нутаг бүх харилцаанд нээлттэй оролцохоор тусгагджээ. Төслийн санал гаргах, судалгаа шинжилгээ, сонгон шалгаруулалт, гэрээ байгуулах гэхчлэн.

Түүнчлэн тухайн төсөл аль орон нутагт хэрэгжиж байна, тухайн орон нутгийн удирдлага гэрээнд оролцож, гарын үсэг зурахаар зохицуулагджээ.

Одоо мөрдөгдөж буй Концессын тухай хуулийн дагуу гэрээ байгуулах эрх нь орон нутгийн удирдлагуудад нээлттэй байдаг. Гэтэл энэ хууль батлагдснаар Концессын хууль хүчингүй болно гэх утга бүхий зүйлийг ажлын хэсгийнхэн тодотгож байв.

Орон нутгийн удирдлагуудад хувийн хэвшлийг дэмжих нэрийдлээр бүх л тендер, концесст гарын үсэг зурах бүрэн эрхийг өгсөн нь улс төрчдийн хамаарал бүхий бизнесүүд цэцэглэх, тэдний "шургаа", шахааг дэмжих боломж бүрдэх нь ээ. Тухайлбал, Өмнөговь аймгийн Засаг дарга Р.Сэддорж “Ажнай” Д.Бат-Эрдэнийн хүн. "Ажнай" Д.Бат-Эрдэнэ, Р.Сэддоржийн фракциар жишээлж бодоход л тэдэнд тендер, концесст оролцож, давуу эрхээр авахад ямар ч хаалт үгүй болж байна.