Чингэлтэй дүүргийн Ерөнхий боловсролын 39 дүгээр сургуулийн газар Дамжингийн Бат-Эрдэнэ гэх этгээдийн эзэмшил болж, барилга, орон сууц сүндэрлэж харин газраа алдсан сургуулийн сурагчид ангидаа багтахгүй гурван ээлжээр хичээллэхэд хүрч, биеийн тамир, урлагийн заалгүй, сургууль руугаа ирж, очих замдаа машинд дайруулах, баригдаж буй барилгын техник, хэрэгсэлд оногдон бэртэж, гэмтэх эрсдэл дундуур өдөр бүр эрүүл энх, амьд байхын тэмцэлд аз сорьсоор олон жилийг өнгөрөөжээ.

ЯАГААД ИЙМ БАЙДАЛД ХҮРЭВ?

Газрын наймаа цэцэглэж, албан тушаалтнууд дураараа дургиж явсан үед Чингэлтэй дүүргийн Иргэдийн хурлын даргаар ажиллаж байсан Дамжингийн Бат-Эрдэнийн шуналыг 39 дүгээр сургуулийн 9600  м2 талбай бүхий газар татаж, захирлыг газрын гэрчилгээ, бичиг баримтаа дүүрэг дээр авчирахыг удаа дараа шаардаж эхэлсэн.

Тухайн үеийн сургуулийн захирал нь газрынхаа бичгийг гэртээ нуудаг байсан бөгөөд 2010 оны сүүлээр нас барах хүртлээ сургуулийн газраа хамгаалж үлдсэн байдаг. Харамсалтай нь захирал нас барснаар 2011 онд сургуулийн биеийн тамирын талбайн газрыг Чингэлтэй дүүргийн өмч болгон шилжүүлж улмаар Иргэдийн хурлын дарга асан Д.Бат-Эрдэнийн эзэмшдэг “Эрдэнэсуварга”  ХХК спорт цогцолбор барьж эхэлсэн.

9600 м2 талбай бүхий газрынхаа 50 хувийг дээрэмдүүлсэн 39 дүгээр сургуулийнхан урд талдаа өргөтгөл барьж, спорт заалтай болох гэтэл тэр газарт нь 450 айлын 16 давхар бүхий 3 блок орон сууцыг мөн л Д.Бат-Эрдэнийн “Соёмбозод орд” ХХК бариулж, ирэх долдугаар сард ашиглалтад оруулахаар төлөвлөжээ.

ДАМЖИНГИЙН БАТ-ЭРДЭНЭ ГЭЖ ХЭН БЭ?

1995 оноос Чингэлтэй дүүргийн Иргэдийн төлөөлөгчдийн хурлын төлөөлөгчөөр сонгогдон ажиллаж эхэлсэн.“Улаанбаатар зам засвар, арчлалт” НӨҮГ-т захирал, Нийслэлийн авто замын газрын дарга, Чингэлтэй дүүргийн иргэдийн төлөөлөгчдийн хурлын дарга гээд 2021 оныг хүртэл даргын ямба, албан тушаал дагасан эрх мэдлээс салаагүй нэгэн. 

Түүний 2018, 2019 онуудад АТГ-т мэдүүлсэн хөрөнгө, орлогын мэдүүлэгт "Соёмбозод интернэшнл” ХХК, “Эрдэнэс таван толгой” ХК, “Соёмбозод орд” ХХК, “Эрдэнэсуварга” ХХК-иудад хувь эзэмшдэг хэмээн бүртгүүлсэн нь өдгөө Чингэлтэй дүүргийн 39 дүгээр сургуулийн газрыг булааж, спорт цогцолбор, орон сууцны барилга барьж буй компаниуд юм.

НЭРЭЭ СОЛЬЖ ЯЛААС МУЛТАРСАН НЬ

Угтаа бол Дамжингийн Батмөнх гэх нэрийг эцэг, эх нь түүнд заяасан ч 2009 онд Нийслэлийн Засаг даргын хэрэгжүүлэгч агентлаг болох Нийслэлийн авто замын газрын даргын албыг хашиж байхдаа Авлигатай тэмцэх газраас төсвийн хөрөнгийг хууль бусаар захиран зарцуулсан эрүүгийн хэрэгт шалгасан байдаг. Эрүүгийн хэрэгт шалгуулах явцдаа Дамжингийн Батмөнх нь нэрээ Дамжингийн Бат-Эрдэнэ болгон өөрчилж, ялаас мултарч явсан шийдчихсэн эр.

Хүний нэрээр амьдарч, улсын төсвөөс хумслах бус шанагаар хутгаж, хагартлаа баяжсан гэгддэг түүний хэргийг Авлигатай тэмцэх газраас хууль зөрчиж, дүүрэгт хохирол учруулаагүй хэмээн шийдвэрлэсэн нь бөгөөд өдгөө ч тухайн хүнийг АТГ-д шалгаж, шалгуулж байсан ул мөр байдаггүй нь хачирхалтай. Холион бантан, хамаг хорны эзэн явсан тэрээр өөрийн эзэмшлийн компаниуддаа ЧД-ийн ЕБС-ийн 39 дүгээр сургуулийн эргэн тойрон дэх газраас алга дармыг ч үлдээлгүй хуу хамж өгчхөөд эцэст нь усанд хаясан чулуу шиг ор сураггүй алга болсон. Нэгэнт хулгайлдгаа хулгайлж, халаасаа түнтийлгэдгээрээ түнтийлгэчхээд нэрээ сольж чадсан хүн одоо зүсээ хувиргаж гоо сайхны мэс засалд орчихоод нэгэнт нэг удаа сольж болсон нэрийг дахин сольчихсон хаа нэгтээ тууж явахыг үгүйсгэх аргагүй. 

ХУЛГАЙ ХИЙХИЙН ТУЛД ХУДАЛДАЖ АВСАН ХУУРАМЧ ДИПЛОМ

Монгол Улсад төрийн алба хаах хууль, дүрэм журам гэж зүйл бий. Мэдээж мэргэжлийн сургууль төгссөн бичиг баримт бол хамгийн эхний шалгуур. Дипломтой бол Төрийн албанд ажилд орох, тэр дундуур хөрөнгө завшиж, хөлжих албан тушаалд томилогдох анхны алхмаа хийнэ. Харин хүний нэр зээлсэн Д.Бат-Эрдэнэ өдөө аж ахуйн их сургууль, Санхүү эдийн засгийн дээд сургуулийг дүүргэсэн гэх ажил, мэргэжлийн диплом нь хуурамч болохыг тогтоон Авлигын эсрэг хуульд заасны дагуу хариуцлага тооцох албан бичгийг 2009 ондоо тухайн үед хотын дарга байсан Г.Мөнхбаярт хүргүүлж байсан. Авлигатай тэмцэх газраас бүрэн эрхийнхээ хүрээнд тавьсан хууль хэрэгжүүлэх удаа дараагийн шаардлагын дагуу хотын дарга асны авсан арга хэмжээ нь Д.Бат-Эрдэнийг ажлаас чөлөөлсөн төдий нүглийн нүдийг гурилаар хуурсан шийдвэр байсныг 2009 оноос хойш хашсан "том" албан тушаалууд нь нотолно.

УУРЫН ЗУУХААС ХАЛУУН УС, БҮР ДАВРААД СПОРТ ЦОГЦОЛБОР БАРИУЛСАН ТҮҮХ

Чингэлтэй дүүргийн 10 дугаар хорооны иргэд Д.Бат-Эрдэнийг андахгүй. Уурын зуух ажиллуулж, “Эрдэнэсуврага” хэмээх үйлчилгээний төв, халуун усны газартай болсон. Харин өнөөдөр “Эрдэнэсуврага” ХХК нь Чингэлтэй дүүргийн 39 дүгээр сургуулийн сурагчдыг Монголд байхгүй спорт цогцолборт спортын бүх төрлөөр биеийн тамирын хичээл ордог болгоно гэж чихэн дээр нь цэцэг ургуулж, цонхны цаанаас чихэр долоолгочхоод ичихгүй алхам бүртээ төлбөртэй спорт цогцолбор барьсан ч сурагчид хичээл орох нь бүү хэл ойртох эрхгүй болжээ. 

Хэрэгтэн нь хариуцлагаа үүрч, хэлмэгдсэн хүүхдүүд Үндсэн хуульд заагдсан эрхээ эдлье.