УИХ-ын чуулганаар Шинэ сэргэлтийн бодлогын хавсралт, Төр, хувийн хэвшлийн түншлэлийн тухай хуулийн төсөл хийгээд хамт өргөн мэдүүлсэн Газрын тухай хууль, бусад хуулийн төслийг хэлэлцэж байна.

Хэлэлцэж буй хуулийн төсөлтэй холбоотой гишүүд асуулт асууж, санал хэлж байна.

УИХ-ын гишүүн М.Оюунчимэг: Энэ Их хуралд хамгийн чухал хуулийн төсөл орж ирж байна гэж харж байна. Сайн хууль гарах ёстой. Эргээд амьдралд хэрэгжих ёстой. Өнөөдрийн энэ хуулинд олон жил доголдож ирсэн, хөгжлийн гацаа болсон зүйлсийг өөрчлөх ямар заалтууд орсон бэ. Нийслэл Улаанбаатар хотын хувьд гэр хорооллын дахин төлөвлөлтийн ажил маш их чухал байна. Үүнийг хувийн хэвшил л хийнэ. Төр дэд бүтцийг нь хийж өгөх ёстой. Үлдсэн ногоон байгууламж зэргийг хамтраад хийх учиртай.  Энэ том ажил гацаад байна. Нийтийн эрх ашгийн тулд гэсэн заалтууд их орж. Нийтийн эрх ашиг, нийтийн хөгжлийн асуудал гэж оруулж ирснийг олзуурхаж хүлээж авч болох уу?. 

Сонгон шалгаруулалтын асуудал бас их чухал байна. Ихэвчлэн яамдууд дээр явж байна. Тэгэхээр тендер, сонгон шалгаруулалт энэ хуультай уялдаж байгаа юу. Төр, хувийн хэвшлийн түншлэлийн сан бий болгоно гэсэн байна. Энэ сан бусад сангаас ямар ялгаатай байх вэ. Хэний удирдлагад явах вэ. Сангийн удирдлагатай холбоотой асуудлыг тодруулмаар байна.

Сангийн сайд Б.Жавхлан: Төр, хувийн хэвшлийн түншлэлийг дэлхий нийт, олон улсын стандарттай нийцүүлж гаргах гэж бэлдсэн хууль. Нийтлэг үндсэн агуулга нь, өсөн нэмэгдэж байгаа төсвийн хэрэгцээ, эдийн засгийн суурь тэлж байгаа өнөө үед хувийн хэвшлийн оролцоог илүү хангахад оршино.  Хувийн хэвшлийнхний бизнесийг нь илүү тогтвортой, олон нийтэд хүртээлтэй байлгах, харин гадаад талдаа хөрөнгө оруулалтыг татах зэрэг бодитой хууль эрхзүйн орчин бүрдэх юм. Нийтийн гэдэг үг хуулинд түлхүү тусгаж өгсөн маш чухал үүрэгтэй.

Товчхондоо, зөвхөн нийтэд зориулсан зүйлд Засгийн газар дэд бүтцийг нь шийдэж өгөх, түншлэх учиртай. Сонгон шалгаруулалт энэ хуулиар зохицуулагдана.

Төр,  хувийн хэвшлийн сан гэж байгаа. Төр,  хувийн хэвшлийн төв гэж бас бий. Төв нь бүх талуудын ажлын харилцан уялдаа холбоо, хяналт тавих институтад зөвлөгөө өгөх чухал үүрэгтэй. Сан нь зөвхөн энэ төвийг санхүүжүүлэх юм.