Чингэлтэй дүүргийн нутаг дэвсгэрт /2024.04.17/-ны орой "Toyota Prius" маркийн авто машин "Hyundai Verna" загварын автомашинтай мөргөлдсөн осол гарч, 8 иргэн осолд өртсөн байна. Тус ослын улмаас 16 настай охин амиа алдаж бусад 7 иргэний биеийн байдал маш хүнд нөхцөл байдалтай байна. 

Тус осолтой холбоотойгоор хохирогчийн найз мэдээлэл хийлээ.

Тэр Бээр “Найз минь хүүхдүүд дагуулаад гарцаар гарч байтал энэ ноцтой осол болсон. Ослын улмаас найзын минь дүү 16 настай охин газар дээрээ амиа алдсан. Харин найз минь уушги, элэг, бөөр, хавирганууд нь бяцралттай, биеийн байдал нь маш хүнд амьдрах эсэх нь тодорхойгүй байна.

Явган хүний гарцаар гарч байсан хүмүүсийг мөргөсөн ийм ноцтой осол болчхоод байхад осол гаргасан хүмүүс, цагдаагийн байгууллагаас хохирогчдын ар гэртэй холбогдоогүй, мэдээлэлгүй өгөөгүй байгаа.

Хэргийн нөхцөл байдал, мөрдлөг, шалгалт хэрхэж байгаа тухай ч хэлээгүй юм билээ. Тэгээд би найзынхаа ээжтэй ярьж байгаад өмгөөлөгч авъя гэхэд өмгөөлөгчийн үнэ хамгийн багадаа 10 сая төгрөгөөс эхэлдэг юм байна. Найзын минь амьдрал тийм ч боломжийн биш.

Ээж нь групп авч, айлын хашаанд амьдардаг, нэн ядуу гэсэн тодорхойлолттой байдаг хүн. Энэ хүмүүс өмгөөлөгчийн урьдчилгаа таван сая төгрөг өгөх байтугай бэлэн сая төгрөг ч байхгүй шүү дээ.

 Тэгээд өчигдөр нэг өмгөөлөгчөөс асуугаад үзтэл хуульдаа эрүүгийн хавтаст хэрэг үүстэл осол гаргасан хүмүүс хохирогчдод ямар нэгэн байдлаар мөнгөн тусламж үзүүлэх боломжгүй байдаг юм байна. Гэхдээ тийм байлаа гээд осол гаргасан хүмүүс ядахаа ирээд, машин, унаагаа гаргаад ойр зуурын тусламж ч үзүүлж чадахгүй байгаад бухимдаж байна.

Найзын минь хавирганууд бүгд бяцралттай байгаа. Ирэх лхагва гарагт нурууны хагалгаанд орно. Эмч нар “Хагалгаа давж гарч чадахгүй ч байж мэднэ” гэж хэлсэн. Гэтэл хагалгаатай өдөр нь найзын минь ээж мөн осолд орж амиа алдсан 16 настай охиноо хөдөөлүүлэх гээд байж байна шүү дээ. Нэг айлын амьдрал орвонгоороо эргэчихлээ” хэмээв.