Нийгмийн сүлжээнд удаа дараа худал мэдээлэл тарааж "Үндэсний эв нэгдлийг бусниулсан" хэргээр шалгуулсан Т.Бат-Эрдэнэд Чингэлтэй дүүргийн Эрүүгийн хэргийн анхан шатны шүүхээс нэг жилийн хорих ял оноолоо. Тэрбээр өнгөрөгч 2023 оны 8-9-р сард "Чагнаа Чаагий" хэмээгч фэйсбүүк хаягаас:

"Баян-Өлгий аймагт дайчилгааны хээрийн сургуулилт хийж байна. Энэ нь тус аймгийн иргэдийг айлган сүрдүүлэх зорилготой". "Монгол Улсын хилийн отрядыг нүүлгэн шилжүүлж, улсын нутаг дэвсгэрээс БНХАУ-д шилжүүлэн өгөх гэж байна"."Казак иргэдийг хүмүүжүүлж, залхаан цээрлүүлэх зорилгоор томоохон ажиллагаа явуулахаар шийдвэрлэсэн байна. Бид та бүхэнд буу зэвсэг, галт хэрэгслээр туслах болно. Бүгдээрээ хамтдаа тэмцэж Засаг төрийг эргүүлцгээе" гэх мэдээлэл байршуулж, олон нийтийг төөрөгдүүлсэн байдаг.

Энэхүү мэдээллийн дагуу тагнуулын байгууллагаас мөрдөн шалгах ажиллагаа явуулж, НПГ-аас “Хүмүүсийг үндэс, угсаа, хэл, арьсны өнгө, шашны номлол, үзэл бодлоор дайсагнуулах, эвдрэлцүүлэх, салан тусгаарлахыг ухуулсан, уриалсан, ялгаварлан гадуурхсан, хүчирхийлсэн, эрхийг нь хязгаарласан, давуу байдал тогтоосон үйлдлийг зохион байгуулсан”, мөн хуулийн 13.14-1-ийн “Хүний нэр төр, алдар хүнд, хуулийн этгээдийн ажил хэргийн нэр хүндэд халдсан илт худал мэдээллийг олон нийтэд тараасан” гэх заалтыг үндэслэн  яллах дүгнэлт үйлдсэн юм. Энэ дагуу анхан шатны шүүхээс Т.Бат-Эрдэнийн худал мэдээлэл тараасан үйлдэлд нь 480 цаг нийтэд тустай ажил хийлгэх, үндэсний эв нэгдлийг бусниулахыг завдсан гэмт хэрэгт арван сарын хугацаагаар хорихоор болж, ялуудыг нэмж нэгтгэн биечлэн эдлэх ялыг нэг жилийн хугацаагаар нээлттэй хорих байгууллагад хорихоор тогтоолоо.