Эмээлт дэх махны үйлдвэрүүдийн асуудал маргаан дагуулж байна. Тодруулбал, Шадар сайд С.Амарсайхан өнгөрсөн баасан гаригт Эмээлт дэх махны үйлдвэрүүдэд шалгалт хийнэ гэж мэдээлснээр тус шөнө нь Хятадууд 8 тонн өмхий мах хот руу тээвэрлэж байгаад баригдсан юм. Мөн шалгалт хийнэ гэж зарласан нь Хятадуудад өмхий махаа зөөх боломж өгсөн, МХЕГ-ын лац авагдсан байсан зэрэг олон асуудал дэгдээд байна.  Энэ талаар Шадар сайд, ХХААХҮ-ийн яам болон холбогдох мэргэжлийн байгууллагууд мэдээлэл хийж байна.

Мэргэжлийн хяналтын ерөнхий газрын дарга Б.Баасандорж: 

Мах чанасан асуудал дээр би шүүмжлэлтэй байгаа. Дотроо бид шүүмжлэлтэй байгаа. Дотоод асуудлаараа бид  Прокурорын хяналт дор лац тавьсан. Тиймээс прокурорын зөвшөөрлөөр лацыг хөндөх ёстой. Мэргэжлийн байгууллагаас энэ компанид шалгалт явуулаад зөрчил байсан тул үйл ажиллагаа явуулах зөвшөөрлийг нь хүчингүй болгосон байсан. 

8 тонн өмхий махны асуудал дээр мал эмнэлэг болон лабортариуд дээж аваад шалгаж байна.

ХХААХҮ-ийн сайд З.Мэндсайхан:

Мал махтай холбоотой асуудал олон жил хөндөгдөж байна. Махны эрхийг зөвхөн яам өгдөг. Мал эмнэлгийн гарал үүсэл дээр үндэслэж экспортлох эрхийг нь тухайн аж ахуй нэгжид өгдөг. Харин энэ асуудалтай холбогдоод байгаа газрууд экспортолдог газрууд биш. Эмээлт дээр байгаа махны тухайд дулааны аргаар боловсруулж байна гэж яриад байгаа. Ийм мах жингийн алдагдалд ордог. Нөгөөтэйгүүр энэ бүхнийг маш сайн шалгаж, мэргэжлийн байгууллагуудын дүгнэлт дээр тулгуурлаж экспортонд гаргадаг. Тэгэхээр Эмээлт дэх энэ компанийн мах экспортод гарахгүй гэсэн үг. Хоёр компанийн талаар яригдаж байгаа хэдий ч Монгол Улсын мах экспортын асуудлыг хөндөж байна. Тэгэхээр хаа хаанаа нухацтай хандмаар байна.