Ерөнхий сайд Л.Оюун-Эрдэнэ УИХ-ын чуулганы индэрээс "Байгаль орчин, аялал жуулчлалын яамны газар зардаг нөхөд болгоомжтой байгаарай. Дараагийн дэлбэрэлт энэ салбарт болж магадгүй. Үүний цаана байгаа улстөрчдийг зарлана” хэмээн сүрдүүлсний нэг жилийн ой өнгөрсөн гуравдугаар сарын 16-ны өдөр тохиосон.

Өөрөөр хэлбэл 2023.03.16-ны өдөр газрын наймаачдыг дэлбэлнэ гэж сүржин мэдэгдэл хийж, Барилга хот байгуулалтын сайд Ц.Даваасүрэнд үүрэг өгсөн.

Ерөнхий сайдынхаа үүргийг Барилга хот байгуулалтын сайд нь биелүүлсэн бол эмнэлэг, цэцэрлэг, сургууль, хүүхдийн тоглоомын болон спорт талбайг хулгайлж, барилга барих зөвшөөрөл өгсөн төрийн эрх мэдэлтнүүдийн нэр олон нийтэд ил болж, газрын наймаачдын сонсгол зохион байгуулагдаж, хуулийн байгууллагууд шалгаж эхлэх байлаа.

Гэтэл нэг жилийн хугацаа өнгөрсөн хэдий ч Ерөнхий сайд Л.Оюун-Эрдэнийн поп сүрдүүлэг, Ц.Даваасүрэн сайдын хэлбэр төдий хүлээсэн үүрэг аль аль нь биелэлээ олж, ажил хэрэг болсонгүй.

Төлөвлөлтгүй газар олголт, төрийн эрх мэдэлтнүүдийн шуналын золиосонд иргэд өртөж үерийн ус, гал түймэр, ослоос шалтгаалан амь нас, эрүүл мэнд, эд хөрөнгөөрөө хохирсоор байна.

Хоёр жишээг дурдъя.

Өнгөрсөн наймдугаар сард болсон үерийн улмаас дөрвөн хүн амиа алдсаны хоёр нь хүүхэд байв. Мөн 282 айл усанд өртөж, 16 айл орон гэргүй болсон.

Энэ оны нэгдүгээр сарын 23-24-нд шилжих шөнө Дүнжингаравын уулзварт газ ачиж явсан машин дэлбэрч ДОЛООН хүн нас барж, ойр орчимд байрлах “Edu” апартмент буюу 207 дугаар байр галд өртөж, оршин суугчид эд, хөрөнгөөрөө хохироод үлдсэн. Ингээд дурдаад байвал жишээ олон. Энэ бүх гамшиг, хохирлын үндэс нь газрын наймаа.

Түүнчлэн сургууль, цэцэрлэг, эмнэлэгийн газраа зараад барилга барьчихсан тохиолдол уртаас урт жагсаалт гарах биз.

Газрын наймаа гэх гайтай балгын хор уршгийг хэдий болтол иргэд хүртэж, халаасаа түнтийлгэж, ашгаа хүртсэн албан тушаалтнуудаа хэдийг болтол нууж хаацайлах вэ?