Монгол Улсад хүчин төгөлдөр мөрдөгдөж буй хууль дүрэм журмыг зөрчиж байж магадгүй нэгэн Хятад хоолны газрын талаарх сурвалжлагыг цувралаар хүргэж байгаа билээ. Ша Шянь зууш хэмээх нэртэй тус газарт үйлчлүүлсэн иргэний гомдол мэдээллийн дагуу хамгийн анхны сурвалжлага бэлтгэн хүргэснээс хойш даруй нэг сар орчмын хугацаа өнгөрчээ. Бид тухайн үед иргэний  өгсөн баримт мэдээллийн дагуу цагдаагийн байгууллагад шалгуулахаар өгсөн юм. Харин тус байгууллагын зүгээс хэргийг хааж шийдвэрлэлээ, манай цагдаагийн байгууллагаас шалгах асуудал биш байна гэх хариу тайлбарыг өгсөн юм.

Одоогоор тухайн Сүхбаатарын талбайн чанх урд, Чойжин ламын музейн зүг харууцтай Ша Шянь зууш хоолны газар үргэлжлүүлэн үйл ажиллаагаа хэвийн ажиллуулж байж магадгүй дүр зурагтай байгаа юм.

Тухайн үед биднийг сурвалжлага бэлтгэх үеэр бидэнд танилцуулсан зөвшөөрлийн бичиг баримт дээрээс үзвэл энэхүү хоолны газрын үйл ажиллагаагаа явуулж буй газар нь “Өмгөөллийн Монгол өмгөөлөгч” ХХН-ийн нэр дээр 15 жилээр эзэмших эрхтэй байгаа юм. Өөрөөр хэлбэл, Ша Шянь зууш хоолны газар “Өмгөөллийн Монгол өмгөөлөгч” ХХН-өөс түрээслэсэн байх магадлалтай гэсэн үг. OPEN DATA сангаас харахад “Өмгөөллийн Монгол өмгөөлөгч” ХХН нь 2006 оны хоёрдугаар сарын 22-нд үүсгэн байгуулагдсан бөгөөд тус нөхөрлөлийн захирлаар хамгийн сүүлд 2024 оны зургадугаар сарын 24-нд иргэн Загдсүрэнгийн Сүхбаатарыг бүртгэсэн  байна.

Тодруулбал,  тус компани нь 2018 ёоны наймдугаар сарын 20-ны өдөр Төрийн худалдан авах ажиллагааны газар бүртгүүлснээс хойш нийт 22 удаа тендерт оролцож, 12 удаад нь шалгарч байсныг tender.gov.mn сайтаас харж болно. Хамгийн сүүлд буюу 2025 оны долдугаар сарын 31-ний өдөр OPEN DATA дахь шинэчлэгдсэн мэдээллээр үйл ажиллагаа нь 6910 кодтой Өмгөөлөл, хууль зүйн зөвлөгөө өгөх гэсэн ганцан чиглэлтэй болохыг бас харж болно. 

Өөрөөр хэлбэл, өмгөөлөх үйлчилгээ үзүүлэх зөвшөөрлөөр өнөөдөр стандартын бус орчинд Монгол Улсад хүчин төгөлдөр мөрдөгдөж буй хууль тогтоомжийг зөрчин хүнсний худалдаа, үйлчилгээ явуулах боломжийг Ша Шянь зууш хоолны газарт олгосон нь хэвийн үзэгдэл үү?  Өмгөөлөл, хууль зүйн зөвлөгөө өгөх ганцхан чиглэлээр үйл ажиллагаа явуулдаг нийгэмлэг газар түрээслэх ажиллагаа явуулж буй нь хуульд нийцэх үү гэх асуултын хариуг бид олох болно. 

Үргэлжлэл бий.