Нэгдсэн Үндэстний Байгууллага байгуулагдсаны 80 жилийн ойг тэмдэглэх хүрээнд зохион байгуулж буй "НҮБ-ын долоо хоног"-ийн эхний үйл ажиллагаа “Хамтдаа хүчтэй: Энх тайван, хөгжил, хүний эрхийн төлөөх 80 жил ба ирээдүй” хэлэлцүүлгээр  эхэллээ.  Хэлэлцүүлгээр Монгол Улсын дэлхий дахинаа олон талт хамтын ажиллагаанд оруулсан хувь нэмэр, НҮБ-ын гишүүн улсын хувьд хүртэж буй бодит өгөөж, НҮБ-Монгол Улсын харилцаа, хамтын ажиллагааны түвшнийг хэлэлцэх, цаашдын чиг хандлагыг тодорхойлох, Монгол Улсын үндэсний хөгжлийн тэргүүлэх зорилтуудыг хэрэгжүүлэхэд НҮБ-ын стратегийн оролцоог бэхжүүлэх талаар санал солилцлоо.

ГХЯ-ны Онц бөгөөд Бүрэн эрхт Элчин В.Энхболд ярихдаа, "Монгол Улс НҮБ-ын бүх гишүүн оронтой дипломат харилцаа тогтоосон улс юм. НҮБ-ын гишүүн орнуудыг нэн буурай хөгжилтэй, хөгжиж байгаа болон хөгжингүй орон гэж гурван ангилалд хуваадаг бөгөөд Монгол Улс хөгжиж байгаа орны тоонд багтдаг.

Өнөөдөр дэлхий нийтээр НҮБ байгуулагдсаны 80 жилийн ойг тэмдэглэж байна. НҮБ нь дэлхийн хамгийн том, нөлөө бүхий олон улсын байгууллага бөгөөд дэлхийн засаглалд чухал үүрэг гүйцэтгэж ирсэн.

Дэлхийн II дайн дууссаны дараа, 1945 оны 10 дугаар сарын 24-нд  НҮБ байгуулагдаж, өдгөө 80 жилийн турш дэлхий дахинд энх тайван, хөгжил, хамтын ажиллагааг бэхжүүлэх үйл хэрэгт тогтвортой хувь нэмэр оруулж байна. Монгол Улсын хувьд тусгаар тогтнол, бүрэн эрхт байдлаа олон улсын хэмжээнд баталгаажуулах түүхэн үйл явдал нь 1961 онд НҮБ-ын гишүүнээр элссэн явдал байв. Түүнээс хойш манай улс энэ байгууллагаас дэмжлэг, туслалцаа авч, олон салбарт хамтран ажиллаж ирсэн" гэв. 

Мөн Монгол Улс НҮБ-ын гишүүний хувьд дэлхий дахины энхийг сахиулах ажиллагаанд идэвхтэй оролцож, 1994 оноос хойш өөрийн улс орноо цөмийн зэвсэггүй бүс гэж зарлан тунхагласан нь олон улсын тавцанд чухал ач холбогдолтой алхам болсон. Өнөөдрийн байдлаар НҮБ-ын 32 гишүүн улс далайд гарцгүй хөгжиж буй орны ангилалд хамаардаг. Монгол Улс эдгээр орны эрх ашгийг хамгаалах, дуу хоолойг олон улсын түвшинд хүргэх үйл хэрэгт идэвхтэй, үр бүтээлтэй оролцсоор иржээ.