Хүний эрхийн асуудал дээр хамгийн зоригтой дуугарч ул суурьтай, судалгаа үндэслэлтэй тоо баримт дэлгэж явдаг гишүүн бол яалт ч үгүй С.Одонтуяа. Дотор харанхуйлж, нүүр халуу дүүгэхээр ноцтой тоо баримтыг дурдаж, хүний эрх зөрчигдөж байгааг онцолсоор ирсэн түүний зорилго энэ цаг мөчид  биелэлээ олов бололтой.

Сөрөг хүчин талаас нь харж аливааг харлуулж шүүмжлэх гэлээ хэмээж түүний хэлээд байгааг зарим хүн үл тоож болох ч НҮБ, Дэлхий нийтийн гаргасан судалгааг үндэслэж хэлж яриад яваад байгааг нь манай улсын ХЭҮК ч батлаад өгсөн юм.

Ямар ч шүүхийн зөвшөөрөлгүй хэн нэгнийг аваачаад хорьчихдог байсан явдал үүгээр таслан зогсоогдлоо. “Хойшлуулшгүй” ажиллагаа нэрийдлээр хүний эрхийг ноцтой зөрчдөг явдал ч үгүй болох нь. НҮБ-ын шинжээчдийн тогтоолыг УИХ, байнгын хороон дээр онцолж тууштай явсныхаа хүчинд тэрбээр өөрийн санаачилсан хуулийн төслийн нэмэлт өөрчлөлтийг УИХ-аар батлуулсан юм. 

Товчхондоо, Эрүүгийн хэрэг хянан шийдвэрлэх тухай хуульд нэмэлт өөрчлөлт оруулахаар болсон нь шүүхийн шийдвэргүй хүнийг баривчилдаг байдлыг таслан зогсоох том зохицуулалт боллоо. 

Ингэснээр бид НҮБ, Олон улсын гэрээ конвецид хүлээсэн үүргээ ч биелүүлэх нөхцөл бүрдлээ.