Холливудын алдарт одод Жонни Депп, Эмбер Херд нарын зургаан долоо хоног орчим үргэлжилж, дэлхий нийтийн анхааралд ороод байсан шүүх хурал өчигдөр Жонногийн ялалтаар өндөрлөв.

Тодруулбал, АНУ-ын Виржиниа мужийн шүүхээс гаргасан шийдвэрийн дагуу Эмбер Херд 15 сая доллараар ЖонниДеппийн нэр хүндэд учруулсан хохирлыг барагдуулахаар болсон байна. Харин 36 настай хатагтай Херд 58 настай Деппийн эсрэг гаргасан гурван нэхэмжлэлийн нэгийг нь ялж, нөхөн төлбөрт хоёр сая долларын нөхөн төлбөр авахаар болжээ.

2017 онд салсан Холливудын одод хамт амьдарч байх үеийн харилцааныхаа бүх л зөрчилтэй асуудлуудаа шүүх хурал дээр ил тод мэдүүлсэн. Шүүх хурлын үйл явцыг олон нийтийн сүлжээгээр шууд дамжуулж, тэдний шуугиантай гэрлэлт, аз жаргалгүй төгсгөлийн нарийн ширийнийг шүүгчдээс гадна ертөнц тэр чигээрээ сонссон гэж хэлж болно.  

Санал асуулгаар олон америкчууд Украйны дайн эсвэл АНУ-ын Дээд шүүхийг тойрсон асуудлуудаас илүүтэй "Депп ба Хердийн шүүхийн маргаан"-ыг сонирхож байгаа нь харагджээ.

Шүүх хоёр сар шахам хэлэлцсэний эцэст лхагва гаригт /2022.06.01/ Хердийн гэрлэлтийн талаарх мэдэгдэл нь "худал" байсан бөгөөд түүнийг "санаатайгаар хорлох" үйлдэл хийсэн болохыг тогтоожээ. Шүүгчид ийнхүү шийдвэрээ гаргах үед шүүхийн гадаа дэмжихээр ирсэн фэнүүд нь "Жонни, Жонни, Жонни" хэмээн орилж байжээ.

Жонни Депп: Шүүгчид миний амийг надад буцааж өгсөн. Би үнэхээр даруу байна

Сүүлийн шатны энэхүү шүүх хуралд Ноён Депп "Өмнө нь төлөвлөсөн ажлын амлалтын улмаас шүүх хуралд оролцоогүй" гэж түүний хэвлэлийн төлөөлөгч мэдэгдсэн байна. Харин шүүхийн шийдвэрийн талаар хийсэн мэдэгдэлдээ Жонни Депп "Шүүгчид миний амийг надад буцааж өгсөн. Би үнэхээр даруухан байна" гэжээ. Мөн тэрбээр "Үнэн хэзээ ч мөхдөггүй" гэх латин хэлцийг нэмж хэлэв.

Депп үргэлжлүүлэн "Үнэнийг хэлэх гэсэн миний эрэл хайгуул надтай адилхан нөхцөл байдалд орсон эрэгтэй, эмэгтэй хүмүүст тусалсан гэж найдаж байна. Тэднийг хэзээ ч бууж өгөхгүй байх гэж итгэж байна" хэмээжээ.

-Эмбер Херд давж заалдахаа мэдэгдэв-

Шүүхийн шийдвэрийг уншиж байх хугацаандаа уйтгар гунигтай суусан жүжигчин бүсгүй мэдэгдэлдээ "Зүрх минь шархалж байна" гэжээ. Тэрбээр тангарагтны шүүх миний гаргасан нотлох баримтыг үл тоомсорлосон гэж маргажээ.

"Шүүх дээр миний гаргаж тавьсан баримтууд хуучин нөхрийн маань нэр хүнд, нөлөөг давж чадаагүйд гутарч байна. Яаж харамсаж байгаагаа үгээр илэрхийлж чадахгүй байна. Би америк хүний ​​хувьд, эмэгтэй хүнийхээ хувьд чөлөөтэй, илэн далангүй ярих, тэмцэх эрхээ алдсандаа илүү харамсаж байна. Энэ шийдвэр бусад эмэгтэйчүүдийн хувьд хувьд хүнд цохилт боллоо. Энэ бол ухралт юм. Үг хэлж, тэмцсэн эмэгтэйг олон нийтийн өмнө гутааж, доромжилж болдог байсан цаг үе рүү ухарч байна" гэжээ.

Үүний дараа Хердийн хэвлэлийн төлөөлөгч шүүхийн шийдвэрийг давж заалдана гэдгээ мэдэгдсэн байна.

Ийнхүү дэлхий нийтийн чихийг "дэлдийгээд" байсан тус шүүх хуралд Жонни Депп ялснаар түүнд алдсан карьераа эргүүлэн авах боломж бүрдлээ. Тэрбээр уг хэргээс болж, "Карибын тэнгисийн дээрэмчид" болон өөр олон кинонд тоглох эрх нь үгүй болж, тэр ч бүү хэл хамтран ажиллаж байсан брэндүүд нь хүртэл гэрээгээ цуцлаад байсан билээ. 

Эх сурвалж: BBC