Хүүхдийн эсрэг хүчирхийлэл болон энэ төрлийн зөрчлийн талаар ЦЕГ-ын Гэр бүлийн хүчирхийлэл, хүүхдийн эсрэг гэмт хэрэгтэй тэмцэх хэлтсийн ахлах мэргэжилтэн, цагдаагийн хошууч Д.Оюун сэтгүүлчдэд мэдээлэл өглөө.

Тэрбээр "Цахим орчинд нийтлэгдсэн бичлэгийн дагуу цагдаагийн байгууллагаас хяналт шалгалтыг үргэлжлүүлж байгаа. Одоогоор Ховд аймаг дахь цагдаагийн алба хаагч хүүхдийн эрхэд халдсан хэргийг АТГ-аас шалгаж байна. Түүнчлэн сурагчийнхаа биед халдсан багшийн асуудлыг ЦЕГ-аас шалгаж байгаа. Урьдчилсан байдлаар гэрийн даалгавар хийгээгүй гэх шалтгаанаар хүүхдийн эрхэд халдсан нь тогтоогдсон. Хүүхдийн биед учирсан гэмтлийг тогтоох зорилгоор Шүүх Шинжилгээний Үндэсний Төвөөс шинжээч эмч томилсон бөгөөд үргэлжлүүлэн шалгаж байгаа. 

Хамгийн гол нь хүүхдийн эрхийг хамгаалах үүрэг хүлээгчид маань энэ төрлийн зөрчил гаргахгүй байхад анхаарах хэрэгтэй. 

Зөвхөн Эрүүгийн хууль, Зөрчлийн хууль гэлтгүй Хүүхэд хамгааллын тухай хууль, Хүүхдийн эрхийн тухай хуулиар хүүхдийн эрхийг баталгаажуулсан байдаг" гэв.

Үүнээс гадна сүүлийн 14 хоногийн хугацаанд бага насны хүүхэд усанд живж амиа алдсан харамсалтай гурван тохиолдол бүртгэгдсэн байна. Иймд хичээл сургуулийн амралт эхэлж буй энэ үед бага насны хүүхдээ харгалзах хүнгүйгээр орхихгүй байхыг анхаарууллаа.