УИХ-ын гишүүн Ш.Адьшаа шинээр өргөн барьсан хуулийн төслийнхөө талаар Төрийн ордонд мэдээлэл хийлээ.

Тэрбээр “Монгол улсын их хурлын гишүүнийхээ хууль санаачлах бүрэн эрхийн хүрээнд өнөөдөр Улсын хурлын даргад Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуульд нэмэлт өөрчлөлт оруулах тухай хуулийн төсөл өргөн барилаа. Энэ хуулийн төслийг батлах нь нийгэмд үүсээд байгаа олон асуудалд цэг тавьж, төрд итгэх итгэлийг бий болгоход чухал ач холбогдолтой. Сүүлийн жилүүдэд төрөөс баталгаа гаргаж, Монгол улсын эдийн засгийг хөгжүүлэх олон зээл хөтөлбөрийг батлан, хэрэгжүүлж байгаа.

Гэвч Жижиг дунд үйлдвэрийг хөгжүүлэх сангаар дамжин хэрэгждэг жижиг дунд үйлдвэрлийг хөгжүүлэх төсөл хөтөлбөрүүд жинхэнэ эздэдээ хүрч чадахгүй, маш их асуудал дагуулсаар байна.

Хөгжлийн банкны тухай асуудал өнөөдөр нийгэмд ямар асуудал үүсгээд байгааг та бүхэн надаар хэлүүлтгүй сайн мэдэж байгаа. Иймд төрөөс баталгаа гаргадаг хөнгөлөлттэй зээлийг нийтийн албанд ажилладаг алба хаагчид, төрийн өндөр албан тушаалтнууд эрх мэдлээ урвуулан ашиглаж, ашиг сонирхлын зөрчил үүсгэдэг энэ асуудалд цэг тавих цаг нь болсон. Энэ хууль нийтийн албаны ажилладаг, Авилгатай тэмцэх газарт мэдүүлгээ өгдөг бүх төрийн албан хаагчид хамаатай” гэв.

Түүний санаачилсан уг хуулийн төсөлд тусгаснаар улс төрд нөлөө бүхий этгээд өөрөө болон өөрийн хамаарал бүхий компаниараа төрөөс баталгаа гаргасан, аливаа төсөл хөтөлбөр, зээлээс авахыг хориглож, хууль зөрчсөн тохиолдолд эргэн төлүүлэх, торгох зэргээр хуулийн бусад арга хэмжээг авах юм байна.

Энэ тухай тэрбээр хэлэхдээ "Энэ хүмүүс жинхэнэ ЖДҮ эрхлэгч, бүтээн байгуулалт хийхийг зорьж яваа жирийн иргэдийнхээ боломжийг хулгайлдаг. Эрх мэдлээ ашиглан “өрмийг” нь хамчихдаг улс төрчид, тэдний хамаарал бүхий хүмүүс улсын мөнгөөр яаж гараа угаадгийг ЖДҮ сангийн зээл, Хөгжлийн банкны үйл явдлаас бэлхэнээ харж болно. Одоо энэ бусармаг, дээрэнгүй байдлыг таслан зогсоож жинхэнэ ЖДҮ эрхлэгч, бизнесмэнүүд нь боломжоо ашиглаж улсаа хөгжүүлэх цаг нь болсон" гэсэн юм.