АТГ-аас өнгөрсөн долоо хоногт эрүүгийн 2 хэрэгт нийт 11 объектод нэгжлэгийн ажиллагаа явуулсан. АТГ-ын мөрдөгчид гэмт хэрэг гарахад нөлөөлсөн шалтгаан, нөхцөлийг арилгуулахаар мөрдөгчийн 4 мэдэгдэл бичиж, холбогдох байгууллагуудад хүргүүлжээ.

Тухайлбал, Нийслэлийн шүүхийн шийдвэр гүйцэтгэх газрын даргаар ажиллаж байсан Э нь удаа дараа согтуугаар тээврийн хэрэгсэл жолоодон цагдаагийн албан хаагчийн тавьсан шаардлагыг биелүүлээгүй зөрчилд Хан-Уул дүүрэг дэх цагдаагийн газрын Замын цагдаагийн хэлтсийн зөрчил хариуцсан байцаагч А нь албан үүрэг, бүрэн эрх, албан тушаалын байдлаа урвуулан ашиглаж, эсхүл зориуд хэрэгжүүлэхгүй байж бусдад давуу байдал бий болгосон гэх хэргийг шүүхэд шилжүүлэх саналтайгаар прокурорын байгууллагад шилжүүлсэн байна.

Тодруулбал, 2020 онд  албан тушаал, эрх мэдлээ урвуулан ашигласан гэх хэргээр хоригдож, асуудал үүсгээд  байсан Нийслэлийн шийдвэр гүйцэтгэх газрын дарга, дэд хурандаа Р.Энхтайван дахин АТГ-т шалгагдаж эхэлсэн нь энэ.  Энэ удаад тэрбээр удаа дараа согтуугаар тээврийн хэрэгсэл жолоодож, цагдаагийн алба хаагчид “эр, бяр”-аа гаргаад зогсохгүй, өөрийнх нь хэргийг хариуцсан байцаагчтайгаа хамт шалгагдаж эхэлсэн байна. Товчхондоо, хэргийг нь шалгаж байгаа байцаагчид нөлөөлсөн эсэхийг давхар шалгаж байгаа гэсэн үг.