АТГ-аас өнгөрсөн долоо хоногт эрүүгийн 2 хэрэгт нийт 11 объектод нэгжлэгийн ажиллагаа явуулсан. АТГ-ын мөрдөгчид гэмт хэрэг гарахад нөлөөлсөн шалтгаан, нөхцөлийг арилгуулахаар мөрдөгчийн 4 мэдэгдэл бичиж, холбогдох байгууллагуудад хүргүүлжээ.

Тухайлбал, Үндэсний Батлан хамгаалах их сургуулийн Цэргийн хөгжмийн сургуулийн захирал О нь 2018 оны 06 дугаар сард тус сургуульд элсэн орох зарим хүүхдүүдийн эцэг эхээс хахууль авсан, тухайн эцэг эхчүүд нь хахууль өгсөн гэх хэргийг шүүхэд шилжүүлэх саналтайгаар прокурорын байгууллагад шилжүүлсэн байна.

Эх сурвалжийн мэдээллээр,  2018 онд тус сургуулийн захирлаар ажиллаж байсан хошууч Д.Одгэрэл хахууль авсан хэрэгт холбогдсон байна. Мөн хүүхдээ сургуульд орох гэсэн эцэг эхчүүд хахууль өгсөн хэргээр шалгагдаж байна.

Ховд аймгийн харьяат Д.Одгэрэлийн хувьд 1997 онд Цэргийн хөгжмийн сургуульд элсэн орж,  2001 онд төгссөн. Төгссөнийхөө дараа Ховд аймгийн Зэвсэгт хүчний 123-аар ангид хөгжимчин ахлагчаар ажиллаж байжээ. Улмаар 2010 оноос Үндэсний Батлан Хамгаалахын Их сургуулийн Цэргийн хөгжмийн сургуулийн уран чадварын тэнхимд багшаар ажиллаж байгаад, 2014 онд БХЯ-ны Төрийн нарийн бичгийн даргын тушаалаар Монгол Улсын Үндэсний Батлан Хамгаалах их сургуулийн хөгжмийн онол, уран чадварын багшаар томилогдон 3 жилийн хугацаанд ажиллаж байжээ. Ингээд 2017 оны есдүгээр сард БХЯ-ны Төрийн нарийн бичгийн даргын тушаалаар ҮБХИС-ийн Цэргийн хөгжмийн сургуулийн захирлаар томилогдсон. Үүнээс жил гаруйн дараа ийн АТГ-т хахуулийн хэргээр шалгагдаж эхэлсэн байна.