Улсын ерөнхий прокуророор иргэнийг, бүр тодруулбал, улстөрчийг томилж болох хуулийг нэр бүхий гишүүд санаачилсан гэх мэдээлэл хөвөрч байгаа. Тодруулбал, Прокурорын тухай хуульд өөрчлөлт оруулах тухай хуулийн 1 дүгээр зүйлд Улсын Ерөнхий прокуророор прокурорыг томилно гэдгийг Монгол Улсын иргэнийг болгон өөрчилсөн байна. Энэ нь Ерөнхий прокуророор улстөрчид томилогдох боломжтой болж байгаа төдийгүй, эрх баригчид ХЗДХ-ийн сайд асан Ц.Нямдоржийг томилохоор хуулийг өөрчилж байна гэсэн хардлагыг нийгэмд үүсгээд байгаа юм.

Тэгвэл энэ талаар УИХ-ын гишүүн Л.Мөнхбаатар “Прокурорын тухай хууль 2017 онд шинэчлэн батлагдсан. Энэ хуулиар Хуульчийн мэргэжлийн үйл ажиллагаа эрхлэх зөвшөөрөл авч, хуульчийн мэргэжлээр 3-аас доошгүй жил ажилласан эсвэл прокурорын туслахаар 2-аас доошгүй жил ажилласан Монгол Улсын иргэнийг прокуророор томилно. Прокуророор 5-аас доошгүй жил ажилласан Монгол Улсын иргэнийг дээд шатны прокуророор томилно. Хуульчийн мэргэжлээр 10-аас доошгүй жил ажилласан, гучин таван насанд хүрсэн прокурорыг Улсын ерөнхий прокурор, түүний орлогчоор томилно гэсэн заалт оруулсан юм.  Ажил мэргэжлээрээ ажиллаад туршлагажсан прокурорыг шат шатанд ахиулж томилдог энэ тогтолцоог бүрдүүлсэн. Энэ ч агуулгаараа Прокурорын байгууллага улс төрөөс ангид байж, хараат бус ажиллах нөхцлийг бүрдүүлэх зорилгоор эрүүгийн хэрэг хянан шийдвэрлэх ажлын туршлагатай, прокурорын байгууллагад ажиллаж байгаа хүнийг дотроос нь сонгож томилдог энэ концепцийг Прокурорын тухай хуулийн ажлын хэсгийн ахлагчаар ажиллаж байхдаа зарчмын хувьд дэмжин батлуулсан. Ингэснээр Улсын ерөнхий прокуророор улс төрчид биш мэргэжлийн прокурор томилогддог нөхцөл бүрдсэн” хэмээн байр сууриа илэрхийлжээ.

Харин УИХ-ын гишүүн Б.Энхбаяр "2017 оны нэмэлт өөрчлөлтөөс өмнө Ерөнхий прокуророос энгийн иргэн байж болно гэдэг заалттай байсан. Тэр дагуу улстөрийн намын дарга байсан Д.Дорлигжав гэж хүн Ерөнхий прокурор болсон. Угтаа бол шүүн таслах ажиллагаа хараат бус байх ёстой. Гэтэл прокурор нь улстөрөөс хараат болчихоор хараат бус байх үүргээ гүйцэтгэж чадахгүй шүү дээ" хэмээжээ.

Дүгнэн хэлэхэд, дахин улстөрч томилогддог болох нөхцлийг одоогийн хуулийн өөрчлөлт, шинэчлэлтээр бүрдүүлэх нь гэж зарим гишүүд хийгээд олон нийтээс үзэж байна.