Төв талбайд өнөөдөр Говийн таван аймгийн малчид “Нутгаа зарахгүй”тайван жагсаалыг хийлээ. Тодруулбал, Дорноговь аймгийн Даланжаргалан, Айраг, Шивээговь сумдын малчид тус суманд үйл ажиллагаа явуулж буй уул уурхайн компаниудыг эсэргүүцэн жагсаж байна.

Энэ тухай Говьсүмбэр аймгийн Шивээговь сумын малчин В.Оюундэлгэр "Говийн сумдад уул уурхай, зам тээвэр, лиценз зэрэг тулгамдаж буй олон асуудал бий. Шивээговь сум 86,000 гаруй га газартай. Түүний 70 хувь нь уул уурхайн лицензтэй. 2021 оноос өмнө лиценз авчихсан 12 уурхай байна. Гэтэл одоо шинээр 3 уурхай манай суманд орж ирэх гээд байна. Харин аймгийн хэмжээнд 8 уул уурхайн компанид лиценз өгсөн гэдэг мэдээлэл бий" хэмээсэн юм.

Ярилцлагын дэлгэрэнгүйг доорх видеоноос үзнэ үү.

Мөн жагсаалд оролцогч малчид "Даланжаргалан сумын 100 гаруй малчин жагсахаар Улаанбаатар хотод ирсэн. Өнөөдөр малчдын гол амжиргаа нь бэлчээр байдаг. Гэтэл бэлчээрийг доройтолд оруулж, уул уурхайн компаниудад лиценз олгож байна. Тиймээс бид лицензийг 30 жилээр олгохгүй байхыг Засгийн газраас шаардаж, Ерөнхийлөгчөөр зарлиг гаргуулахаар жагсаж байна.

Нэг суманд одоогийн байдлаар 98 лиценз байгаа. Шинэчилсэн хуулиар 10-ыг нэмнэ гэж байгааг эсэргүүцэж байна.

 

Өмнөговь аймгаас Чойр чиглэлийн 470 км замд л гэхэд 30-40 салаа шороо зам үүсгэж 80-100 гаруй тонн ачаа тээвэрлэдэг. Тиймээс тоосжилт ихээр үүсч, ойр хавийн хүмүүс нь амьдрах аргагүй болж байна" гэцгээж байв.

Тэд ирэх сарын 03-ныг хүртэл Төв талбайд иргэдээс гарын үсэг цуглуулж, жагсах юм байна.