Нийслэлийн ИТХ-ын ээлжит XIV хуралдаан үргэлжилж байна.  Хуралдаанаар Нийтийн тээврийн парк шинэчлэлтийн  талаар авах зарим арга хэмжээний тухай, “Зорчигч тээврийн нэгтгэл”, “Зорчигч тээвэр гурав” ОНӨААТҮГ-ын нийгмийн даатгалын өрийг шийдвэрлэх тухай хэлэлцэж эхэллээ. 

Энэ үеэр   “Зорчигч тээвэр гурав” ОНӨААТҮГ-ын захирал О.Ганбаатар “Нийтийн тээврийн олон тулгамдаж байгаа асуудлуудыг эхнээс цогцоор нь шийдэж өгч байгаад баярлаж байна. 2020 онд маш олон асуудалтай байгууллага хүлээж авсан. Хуучин “Автобус 3”-ын байрыг дуудлага худалдаагаар зарснаас болж өөрийн гэсэн байргүй болсон. Ковидын үед төсөв хөрөнгө байхгүйгээс Тахилтад баригдаж байгаа байр удааширсан. Манайд 2.7 тэрбум төгрөгийн нийгмийн даатгалын өр байгаа. Үүнээс  1.7 тэрбумыг урьдчилгаа санхжүүлтээр шийдэх боломжтой гэж үзэж байгаа. Бүтэн 100 хувь дарая гэж үзэхээр байгууллагын санхүүжилтэд хүндрэл учирна. Мэдээж нийгмийн даатгалд нэмэлт өр үүсгэхгүй ” гэв.

Зорчигч тээврийн нэгтгэл болон Зорчигч тээвэр III орон нутгийн өмчит аж ахуйн тооцоотой үйлдвэрийн газруудын 2018 оноос өнөөдрийг хүртэлх нийгмийн даатгалын шимтгэлийн хуримтлагдсан өр төлбөр 4,896.0 сая төгрөгт хүрчээ. Дээрх хоёр байгууллага нь 2025 ажилтантай бөгөөд хуримтлагдсан өр төлбөрийн асуудлаас үүдэн нийгмийн болон эрүүл мэндийн халамж үйлчилгээг ажилтнууд авч чадахгүйд хүрээд байгаа аж. Тиймээс нийслэлийн 2022 оны төсөвт зохицуулалт хийж, урьдчилсан санхүүжилт олгох асуудлыг шийдвэрлүүлэх саналыг Нийслэлийн ИТХ-д Засаг даргаас оруулж ирсэн юм.  Хэлэлцүүлгийн үеэр төлөөлөгчид орон нутгийн өмчит аж ахуйн тооцоот газрын үйл ажиллагааг дордуулж, өр төлбөрт унагасан асуудлаар хариуцлага тооцох асуудлыг хөндсөн юм. Тодруулбал, төлөөлөгч П.Ганзориг автобус компаниудын нийгмийн даатгалын хуримтлагдсан өр төлбөрийг барагдуулахыг дэмжиж байгаа ч, хууль бус үйл ажиллагааг өөхшүүлээд байж болохгүйг сануулсан юм.

Улмаар нийтийн тээврийн үйлчилгээ эрхлэгч дээрх хоёр аж ахуйн нэгжийн өмнөх онуудад үүссэн өр төлбөрийн улмаас байгууллагын ажилтнуудын нийгмийн асуудалд хүндрэл үүссэн тул 2022 оны төсөвт батлагдсан машин цагийн зардлаас нийгмийн даатгалын 4 тэрбум төгрөгийн барагдуулах урьдчилсан санхүүжилт олгохыг төлөөлөгчдийн олонх нь дэмжиж, тогтоолыг баталлаа.