Нийслэлийн ИТХ-ын ээлжит XIV хуралдаан өнөөдөр хуралдана.  Өнөөдрийн хуралдааныг төлөөлөгч Д.Ихбаяр ахалж байна. Яг одоо Цэргийн албыг биеэр дүйцүүлэн хаах иргэдийн тоог батлах тухай асуудлыг хэлэлцэж эхэллээ.

Хэлэлцэж буй асуудалтай холбогдуулан төлөөлөгч  С.Эрдэнэбаяр “Дүүрэг дээр ажилладаг хүний хувьд биеэр дүйцүүлэх албыг хаалгахад тодорхой зардлууд гардаг гэдгийг онцолж хэлмээр байна. Хувцас хэрэглэл, сургалт гэхчлэн. Энэ хугацаанд гарч байгаа зардал мөнгийг яах ёстой вэ. Одоогоор дүүргийн ЗДТГ-ын нөөц хөрөнгөөс гаргадаг” гэх асуулт асуув.

Хурандаа Г.Ялалт “Цэргийн албыг биеэр дүйцүүлэн хаах албаны  тоон дээд хязгаарыг  Засгийн газраас баталдаг. Дүүргүүдээс санал өгдөг.  Харин хөрөнгө мөнгийг хуулиар хүлээсэн үүргийн дагуу дүүрэг хариуцаж, төсөвтөө суулгаж зардлаа хариуцах ёстой. Хувь хүнд чиглэсэн дадлага сургалтыг төлөвлөгөөнд оруулаад дүүрэг батлаад явах ёстой” хэмээв.

Ташрамд тэрбээр “Цэргийн албыг олон талт хэлбрээр явуулах нь үр дүнтэй гэх үндсэн бодлого явж байгаа. Тухайлбал, саяхан “Оюутан цэрэг” төрлөөр алба хаадаг  болсон. Цэргийн дүйцүүлэх албыг олон судалгаан дээр үндэслэн гаргасан. Тухайлбал, нийгэмд шашин шүтэх, эс шүтэх эрх нь чөлөөтэй.  Ямарч шашин шүтдэг хүн өөрөө хүсээд энэ дүйцүүлэх албыг хааж болно.

Нэг жишээ дурдахад, бөөгийн шашин шүтдэг залуу цэрэгт очсон хойноо маш олон төрлийн үйлдэл хийх гээд, зан авир гаргаж, цэргийн алба хаагчдын сэтгэлзүйд нөлөөлсөн.  Тэр хүнтэй тусгайлан уулзаад ийм ийм төрлөөр алба хаах боломжтой гэж зөвлөхөд, дүйцүүлэх албыг сонгосон байх жишээний. Иймэрхүү нөхцөл шалтгааны улмаас дүйцүүлэх албаны тоог баталсан” гэсэн юм.

Хуралдаан үргэлжилж байна.