Хүнсний хангамж, аюулгүй байдлыг хангах талаар авах зарим арга хэмжээний тухай Улсын Их Хурлын 2022 оны 36 дугаар тогтоолын 3 дугаар хэсгийн Газар тариалангийн үйлдвэрлэлийн чиглэлээр хэрэгжүүлэх ажилд импортоор авч буй хүлэмжийн 15407 тонн хүнсний ногооны 100 хувь дотоодын хүлэмжийн үйлдвэрлэлээр хангахын тулд шинээр 50.0 га өвлийн, 100 га зуны хүлэмж нэмж байгуулан хүлэмжийн талбайг 270 га талбайд хүргэх зорилт дэвшүүлсэн.

Энэхүү зорилтыг хэрэгжүүлэхэд хүлэмжийн аж ахуй байгуулахад урт хугацаат зээлийн эх үүсвэр бий болгох, зээлийн хүүгийн хөнгөлөлт үзүүлэх, гадаад орон, олон улсын байгууллагаас хүлэмжийн аж ахуй байгуулах төсөл хөтөлбөр хэрэгжүүлэх, хүлэмжийн аж ахуйн технологийг хөгжүүлэх судалгаа шинжилгээний ажлыг эрчимжүүлэх, хүлэмжийн аж ахуй эрхлэгчдийн технологийн мэдлэг чадвар, эдийн засгийн үр ашгийг дээшлүүлж, чадавхижуулах чиглэлээр салбарын яамнаас идэвхтэй ажиллаж байгаа юм.

Энэ ажлын хүрээнд АНУ-ын Олон улсын хөгжлийн агентлаг, НҮБ-ын Хүнс, хөдөө ахуйн байгууллагуудтай хамтран “Хүнсний ногооны үйлдвэрлэл, зах зээлийн гарцыг нэмэгдүүлж, эдийн засгийг дэмжих” төслийг хэрэгжүүлж эхлүүлээд байгаа юм. Төслийн хүрээнд эрчим хүчний хэмнэлттэй, ургалтын хугацаа урт, дунд хэмжээний хүлэмжүүд бүхий загвар аж ахуйг бий болгох бөгөөд төслийн суурь судалгааны тусламжтайгаар Монгол орны цаг уур, агро-экологи, зах зээлийн чиг хандлагад тохиромжтой хүлэмжийн загвар, хүлэмжид тариалахад хамгийн ашигтай таримлууд зэргийг тодорхойлох юм.

           Төслийн суурь судалгааны хүрээнд НҮБ-ын Хүнс, хөдөө аж ахуйн байгууллагын суурин төлөөлөгч Винод Ахужа, ХХААХҮЯ-ны Төрийн нарийн бичгийн дарга Т.Жамбалцэрэн болон төслийн судалгааны багийнхан нийслэл, нийслэл хот орчмын зарим хүлэмжийн аж ахуйн бүтээн байгуулалт, үйл ажиллагаатай танилцаж, аж ахуйн эрхлэгчдийн санал хүсэлтийг нь сонсож, төр засгаас авч хэрэгжүүлж байгаа бодлогын арга хэмжээний талаар мэдээлэл өгч ажиллалаа.