Нэр алдартай хүн гэхээс илүү Монголынхоо төлөө нулимсаа урсган ярьж, дуулж бас ажиллах сэтгэлээс тань илүүтэйг бодож анзаарч амжсангүй...

С.Жавхлан хамгийн хайртай “ажил” болох дуугаа дуулаад явахад Монгол бүү хэл Монгол туургатан даяараа хүндлэлийн  сайхнаар таныг угтана бас хамгийн амар тайван амьдралаар та амьдарна. Гэсэн ч та зөвхөн өөрийгөө бодож, биеийн амрыг харж, хар амиа хоохойлсонгүй!!!

Хэн бүхэнд хэлэх, хэлэхгүйгээрээ хэлүүлж байсан ч хийсэн ажлаа зарлаж биш барж хийж ирсэн. Хэний ч танихгүй барилгачины гарт цагаан бээлий, хайч 2 атгуулаад хийсэн хүн нь энэ шүү гээд хойно нь алга ташаад зогсож чаддаг гүндүүгүй эр! 

Энгийнээр хэлэхэд та бол цагаан тууз хайчлахаас цагаан сэтгэлтэй байх нь илүү чухал гэдгийг ирээдүй хойчдоо үлгэрлэж байгаа хариуцлагтай эцэг, хvний хань, нөхдийнхөө түшиг...

Уул, ус, газар шороо, хайртай бүхнийхээ төлөө тэмцсээр байгаад дуусах ноён нуруу. Сайн сайхны төлөөх ерөөл залбирлынхаа тэргүүнд МОНГОЛ-ЭХ ОРОН минь гэж чинь зүрхэндээ дээдэлсээр байдаг нэгэн.

Төрдөө ч мөн л энэ дуу хоолойгоо хүргэн,түмэндээ хүндлэгдэн сонгогдон ажилласан боловч хавцалд ганцаар хашгирах мэт цаг хугацаа байсан...

Гэхдээ л би хийлээ гэж дэлдээгүй хийсэн шийдсэн ажлууд бий бий...

Харин дөвийлгөж харвал бурхан таныг, уран барималч шиг яруу тансгаар сийлж, үнэнийг л дуулж яваарай хэмээн гангар шаазан бийрээр гараа гарган хоолойг тань урласан болов уу гэмээр авьяастан. Зургаар бол суут бүтээл гэчихмээр ч юм уу.

Энэ хүртэл нөхөрлөж ирсэн цаг үеэ санаж, цааш энэ нөхөрлөл ямар сайхан үргэлжлэх тухай бодож байна. Ямар их тууштай чанар, ямар их цагаан сэтгэл, ямар их эр зориг вэ гэж бодном. Туулсан замыг тань, туучсан бартаа бүрийг тань хүндэтгэн бичиж байна. 

Би дуу мэднэ гэхдээ зуун зуунаар дурсагдах захгүй их дуун суварга босгож мөнхжүүлсэн дуучныг цөөхөн мэднэ. 

Зүүдэнд уяатай аав, Дулаахан намраа нүдэндээ нулимстай дуулсан, Ээжийн чанасан цайг ээжийгээ  хайрлах ухаарлыг ойлготол дуулсан, Миний найзыг та өглөөний нарыг хамт угтах өнөр олон нөхдийнхөө хайранд ханаж дуулсан Монголын үнэртэй салхийг та Монголчуудын зүрхэнд хадаж дуулсан.

Хамаг Монголчуудаа нэгдтэл 
Хатан зүрхэндээ уйлтал бас огштол та дуулсан.

Таньтай ах мөн дүү хэмээн явж, таныг уйлахад өмөөрч, баярлахад нь инээж, таньтай цуг тайзнаа гарч таны тоглолтыг хөтлөн, зохион байгуулалцаж үгээр илэрхийлэхийн аргагүй адал явдалтай учирч явах сайхан. 

Хүний орчлонд хүн байхын тухайд ойлгуулдаг ахын үг сайхаан. Түүхийг та бүтээсээр... Цаашлах бүрт шинэ түүхийн хуудсыг шинээр эргүүлсээр байх болно оо. 

Хэнд ч хүн ёсоор хандаж, анд найз шиг зөвлөж, ахын үгээр зөөллөж бас усалж, ургуулж чаддаг хүндэт ах минь билээ та. 

Та бол, 
Тоос хөдөлгөх төдийд биш 
Даваа давж, далайг гатлах их хүмүүн заяанд мэндэлсэн 
Монгол хүн 
Монголчуудын хайртай 
хүү Самандын Жавхлан...
Хүндэтгэсэн: Болдын Эрдэнэбаяр