УИХ-ын Ёс зүй, сахилга хариуцлагын байнгын хорооноос "УИХ-ын гишүүний ёс зүйн дүрэм" болон УИХ-ын гишүүдийн ирцийн асуудлаар мэдээлэл хийлээ.

УИХ-ын гишүүн, Ёс зүй, сахилга, хариуцлагын байнгын хорооны дарга Б.Бат-Эрдэнэ "Шинээр батлагдсан УИХ-ын гишүүний ёс зүйн дүрэм гуравдугаар сараас эхлэн мөрдөгдөж байгаа. Тус дүрэмд хүндэтгэн үзэх шалтгаангүйгээр чуулганы нэгдсэн, байнгын, дэд, түр хорооны хуралдааныг тасалсан цаг нь ажлын таван өдрийн цагаас буюу 40 цагаас дээш гарсан бол Ёс зүй, сахилга, хариуцлагын байнгын хорооны хуралдаанаар оруулж, хэлэлцүүлэхээр заасан.  

2022 оны хаврын ээлжит чуулган эхэлсэн гурав, дөрөвдүгээр сарын ирцийн мэдээг олон нийтэд танилцуулж байна. Өнгөрсөн гуравдугаар сард УИХ-ын чуулган 7 удаа хуралдсан.

УИХ-ын 18 гишүүн хуралдаан тасалж, 8 гишүүн хоцорч, 62 гишүүн хуралдааныг огт таслаагүй байна. 

Дөрөвдүгээр сард, УИХ-ын чуулган 12 удаа хуралдсан. Хуралдааныг 20 гишүүн тасалж, 57 гишүүн хоцорч, 56 гишүүн хуралдааныг огт таслаагүй байна. 

Хамгийн их хоцролт, тасралттай гишүүдийн танилцуулья. 

Хууль зүйн сайд Х.Нямбаатар хуралдааныг дөрвөн удаа тасалж, таван удаа хоцорсон бол Т.Доржханд гишүүн гурван удаа тасалж, дөрвөн удаа хоцорсон байна. Мөн Б.Жавхлан, Ц.Туваан, А.Адьяасүрэн, Э.Бат-Амгалан, С.Батболд, Ж.Батсуурь, Г.Ганболд, Д.Өнөрболор, Ж.Эрдэнэбат, С.Амарсайхан, Ц.Анандбазар, П.Анужин, Ж.Бат-Эрдэнэ, Ц.Мөнцэцэг, Л.Энх-Амгалан нарын гишүүд нэгээс дээш удаа тасалж, хоёроос олон цаг хоцорсон байна. 

Харин Т.Аюурсайхан, Н.Алтанхуяг, Ё.Баатарбилэг, Х.Баделхан, Б.Жаргалмаа, Г.Занданшатар, М.Оюунчимэг, Д.Тогтохсүрэн, Ж.Чинбүрэн, Б.Бат-Эрдэнэ нарын гишүүд гурав, дөрөвдүгээр сарын хуралдаанд хоцролт, таслалтгүй оролцсон байна. 

УИХ-ын гишүүд бүх түвшинд манлайлал үзүүлэх ёстой. Хаврын чуулганы ирцийн мэдээллийг намрын чуулгантай харьцуулж харахад, тасралт, хоцролт нэмэгдэх хандлагатай байна. Тиймээс УИХ-ын намын бүлгүүд дээр гишүүдийн ирцтэй холбоотой асуудлаар тусгай мэдээлэл хийсэн байгаа" гэлээ. 

Харин огт хоцролтгүй байгаа гишүүдийн хувьд:

• Т.Аюурсайхан
• Н.Алтанхуяг
• Б.Бат-Эрдэнэ
• Ц.Идэрбат
• М.Оюунчимэг
• Г.Дамдинням
• Б.Пүрэвдорж
• Д.Тогтохсүрэн
• Ж.Чинбүрэн зэрэг гишүүд байна.

Хоцролтой гишүүдийн цаг 40-өөс дээш болбол сануулах арга хэмжээ авна. УИХ-ын гишүүд бүх түвшинд манлайлал үзүүлэх ёстой. Тиймээс хоцролт өндөр гишүүд иргэдээс өөрийн биеэр уучлалт гуйх заалттай.