Чуулганы нэгдсэн хуралдаан үргэлжилж байна. Хуралдаанаар Монгол Улсын Ерөнхийлөгчийн өргөн мэдүүлсэн "Хүнсний хангамж, аюулгүй байдлыг хангах талаар авах зарим арга хэмжээний тухай" УИХ-ын тогтоолын төслийн хэлэлцэх эсэхийг хэлэлцэж байна. 

-Тахианы мах, өндөг, гахайн мах, өөхийг дотоодын үйлдвэрлэлээр бүрэн хангах боломжтой-

Манай улсын гол нэрийн 16 нэр төрлийн хүнсний түүхий эд, бүтээгдэхүүнээс  малын мах, улаан буудай, гурил, төмсийг дотоодоосоо 100 хувь хангаж байна. Харин сүүн бүтээгдэхүүн 27.1, гурилан бүтээгдэхүүн 38.2, хүнсний ногоо 38.5, өндөг 48.6, цөцгийн тос 67.4, тахианы мах 98, ургамлын тос 98.5 хувь нь импортын хамааралтай байгаа аж. Байгаль, цаг уурын онцлогоос шалтгаалан тариалах боломж хязгаарлагдмал буурцагт ургамал, бүх төрлийн будаа, элсэн чихэр, загас, загасан бүтээгдэхүүн 100 хувь, хүнсний сав баглаа боодлын үндсэн түүхий эдийн  95 хувийг импортоор авч байна. Манай улс 2021 онд 962 сая ам. доллар буюу 2.7 их наяд төгрөгийн хүнсийг импортолсон ба жилд дунджаар 2.5 их наяд төгрөгийн импорт хийж байгааг тогтоолын төслийн танилцуулгад дурджээ. 

Судалгаагаар манай улс 2030 он хүртэлх хугацаанд малын мах, махан бүтээгдэхүүн, сүү, сүүн бүтээгдэхүүн, гурил, гурилан бүтээгдэхүүнийг дотооддоо бүрэн хангаж жилд дунджаар 95.4 мянган тонн малын мах, 54.6 мянган тонн махан бүтээгдэхүүн, 288 мянган тонн сүү, сүүн бүтээгдэхүүн, 111 мянган тонн гурил, 21 мянган тонн гурилан бүтээгдэхүүн экспортлох боломжтой байгаа бол хүн амын хэрэгцээт жимс жимсгэний 23, ургамлын тосны 69, хүлэмжийн ногооны 41, элсэн чихрийн 41, төрөл бүрийн будааны 44 хувийг дотоодын үйлдвэрлэлээс хангаж, ил талбайн ногоо, тахианы мах, өндөг, гахайн мах, өөхийг дотоодын үйлдвэрлэлээр бүрэн хангах боломжтой аж.

Түүнчлэн дээрх гол нэрийн 16 нэр төрлийн хүнсний түүхий эдийг бэлтгэхэд одоо байгаа усалгаагүй 557 мянган га талбай дээр шинээр 479 мянган га талбай,  усалгаатай 30 мянган га талбай дээр шинээр 33 мянган га талбайг эргэлтэд оруулж, жилд 1931 мянган тонн тэжээл шаардлагатай гэсэн тооцоо гарч байна. Иймд гол нэрийн хүнсний бүтээгдэхүүнийг дотоодоосоо хангах, зөвхөн хүнс хөдөө аж ахуйн салбар бус улсын хэмжээнд нийт салбарын хүрээнд хамтран ажиллах, хүн амын хүнсний хангамж, аюулгүй байдлын хангах чиглэлээр нэгдсэн бодлого хэрэгжүүлэх шаардлагатай байна гэж төсөл санаачлагчид үзжээ.

Хэлэлцэж буй асуудалтай холбогдуулан гишүүд асуулт асууж, хариулт авч байна.

УИХ-ын гишүүн Д.Сарангэрэл “Ерөнхийлөгчийн "Хүнсний хангамж, аюулгүй байдлын тогтоолын төслийн  сайн хэрэгжүүлж чадвал монгол хүнийхээ эрүүл мэндийг хамгаалахад дэвшил гаргах бүрэн боломжтой.  2023 оны улсын хөгжлийн төлөвлөгөө, төсөв хэлэлцэж байгаа энэ үед Ерөнхийлөгчийн санаачилсан тогтоолын төслийн санхүүжилтийг тодорхой болгомоор байна” гэв.

УИХ-ын гишүүн С.Одонтуяа “Ерөнхийлөгчийн санаачилсан тогтоолыг дэмжиж байгаа. Химийн бодистой холбоотой мах, хиамны асуудал хэвлэл мэдээллээр дэгдлээ. Энэ асуудлыг зүгээр нэг Зөрчлийн асуудлаар шийдмээргүй байна. Ийм зүйлд оролцсон хүмүүсийг хатуу шийтгэхгүй бол хүмүүсийн ходоодруу шууд хор орж байна.  “Азийн чоно” хэргийг та бүхэн санаж байгаа бол архины хордлогоос болж 20 хүн нас барж, холбогдох хүн нь 2 жилийн ял аваад гарсан. Энэ мэт хүнсний аюулгүй байдал дээр хуулиа чангатгамаар байна” гэлээ.

Ерөнхийлөгчийн Тамгын газрын дарга Я.Содбаатар: Хүнсний аюулгүй байдлын асуулаар Монгол Улс эрсдэлтэй түвшинд орсон. Манай лабортарийн хүчин чадал дутагдалтай байна. Хүнсний аюулгүйн үзүүлэлтүүдийг бүрэн тодорхойлох боломжтой болгох үүднээс  ажиллаж  байгаа. Иргэдийн ширээн дээр очиж байгаа хүнс хор биш, шим тэжээлтэй хүнс байх талаас нь нэлээн анхаарч, хууль орчныг чангатгах чиглэлрүү ажиллаж байна. Энэ тогтоол бусад салбарын хуулиудтайгаа уялдаж явж байгаа.