Чуулганы нэгдсэн хуралдаан эхэллээ. Хуралдаанаар Монгол Улсын нэгдсэн төсвийн 2023 оны төсвийн хүрээний мэдэгдэл, 2024-2025 оны төсвийн төсөөллийн тухай хуулийн төсөл болон хамт өргөн мэдүүлсэн “Засгийн газрын өрийн удирдлагын 2023-2025 оны стратегийн баримт бичиг батлах тухай” Улсын Их Хурлын тогтоолын төслийг хэлэлцэж байна.

Хэлэлцэж буй асуудалтай холбогдуулан гишүүд асуулт асууж, хариулт авч байна.

УИХ-ын Ц.Цэрэнпунцаг: Юмны үнэ өсөөд байна гэж ард түмэн бухимдаж байна. Энийг яаж зохицуулах юм бэ. Цалин, ажиллах хүчээ яах юм. Хувийн хэвшилд өндөр цалин өгөхгүй бол ажиллах хүн олдохоо байлаа. Цалин, хүний нөөцийн асуудлаас болж бүтээгдэхүүн дээр үнэ нэмэгдэж байна. Төсвийн сахилга бат гэдэг юман дээр олон юм тоочиж ард түмний толгойг эргүүлж байна. Төсвөө ашигтай, алдагдалгүй баталж баймаар байгаа.

Төсвийн байнгын хорооны дарга Ч.Хүрэлбаатар “Инфляци хаа сайгүй л асуудал болж, үнийн өсөлт явагдаж байна. 2022 оны төсөв хэлэлцэж байхад мөн л энэ асуудлыг Засгийн газар, Монгол банкнаас асуусан. Тэгэхэд 6 билүү 8 хувь дээр барьчихна гэж хэлж байсан. Ингэж бодлогын баримт бичгээ батлуулсан. Одоо 15 хувьтай. Валютын ханш 3100 гарчихлаа. Төсөв ярьж байхад Монгол банкы ерөнхийлөгч тасралтгүй худлаа ярьсаар гарсан. Тэр хүн энэ инфляци, үнийн хөөрөгдөлд хариуцлага хүлээх ёстой. Ер нь бодлогын алдаа гаргаад 3.4 сая хүний амьдралыг там болгож байгаа хүмүүст хариуцлага хүлээлгэж сурмаар байна. 8 хувийн асуудлыг төсвийн тодотгол ярьж байхад болно, бүтнэ л гэсэн. Одоо хар. Санаатайгаар худлаа мэдээлж, бодлогын алдаа гаргаж байгаа бол үр дүн хангуулаагүй асуудлыг ярих хэрэгтэй. Монгол банкны ерөнхийлөгч зугтаагаад байх шаардлагагүй. Чаддаг мэддэг хүнээр нь ажлыг нь хийлгэхгүй бол болдоггүй байгаа шүү” гэв.

Ташрамд, Төсвийн байнгын хорооны дарга Ч.Хүрэлбаатар үргэлжлүүлэн “2023 онд төрийн албан хаагчдын цалинг нэмнэ. Чухам яаж нэмэхээ 2023 оны төсвийг оруулж ирэхдээ давхар оруулж ирнэ” гэдгийг онцоллоо.