АНУ-ын засгийн газар Украинд үзүүлэх зэр зэвсгийн багц тусламждаа ураны орцтой их бууны сумнуудыг нийлүүлэхээр болжээ.

Ураныг баяжуулах явцад гаргаж  авдаг бүтээгдэхүүнээр үйлдвэрлэсэн тус сум нь маш хатуу тул танкны ямар ч хуягийг нэвтлэх чадвартай байдаг.

Өчигдөр Оросын эрх баригчид тус шийдвэрийг хатуу шүүмжилсэн мэдэгдэл ТАСС агентлагаар дамжуулж гаргажээ. “АНУ-ын засаг захиргаа ураны хаягдлаар үйлдвэрлэсэн зэвсэг нийлүүлэх болсон нь хүмүүнлэг бус үйлдэл юм. Вашингтон “стратегийн ялагдалд” хүрэхгүйн тулд сүүлчийн украин хүнийг үлдтэл мөргөлдөөнийг үргэлжлүүлээд зогсохгүй хүний нэг бүхэл бүтэн үеийг устгахад бэлэн байгаа нь эндээс харагдаж байна” гэж ОХУ-ын Вашингтон дахь элчин сайдын яам Телеграм хуудсаараа мэдэгдсэн байна.

Ийм зэвсэг дэлбэрэхдээ цацраг идэвхт бодис ялгаруулдаг тул дайтагч талуудыг ялгалгүй хор хөнөөл учруулах аюултай гэж уг мэдэгдэлд тайлбарлажээ.

Энэ оны эхээр Их Британийн засгийн газар бас ураны орцтой сум Украинд нийлүүлэх шийдвэр гаргаж байв. Олон улсын гэрээгээр ийм зэвсгийг хориглоогүй байдаг. Гэхдээ дэлбэрэлтээс үүссэн тоосонцор нь хүний эрүүл мэндэд ямар нөлөө үзүүлдгийг бүрэн тогтоогдоогүй, маргаантай байдаг юм.

АНУ-ын үндэсний аюулгүй байдлын зөвлөлийн хэвлэлийн төлөөлөгч Жон Кирби шинээр илгээж буй зэвсгийг цацраг идэвхийн нөлөөгүй тул цөмийн зэвсгийн ангилалд багтахгүйг тайлбарлажээ.

“Энэ бол хуяг эвдэх чадвартай ердийн зэвсэг юм” гэж тэр хэлсэн байна.

Их Британийн засгийн газар ийм зэвсэг Украинд нийлүүлэх шийдвэр гаргахад ОХУ-ын тал үүнийг “цөмийн ангиллын зэвсэг” хэрэглэж эхэлсэнд тооцож, зохих хариу арга хэмжээ авахаа Өрнөдийнхөнд анхааруулж байв.