Сонгуульд санал хэрэгтэй, ялах нь чухал байж болно. Гэхдээ хөгжлийн бэрхшээлтэй хүүхдүүдээр "тоглох" эрхтэй гэж үү Ерөнхийлөгч өө. 

Улс төрийн бохир, завааныг, улс төрчдийн худалч, хөрснөөс хол тасарсан, агаар дээрх попролыг энд ярихаа больё. Ярьшиг зүгээр.

Гэхдээ хөгжлийн бэрхшээлтэй хүүхдүүдээ эмчлэх, асрах, нийгмийн ялгаваргүй өсгөчих гээд шар махтайгаа хатаж яваа эцэг, эхийн итгэл үнэмшил дээр өрөвдөх сэтгэлгүй хахир зангаа татаж явах хүний чанар гэж бас байх ёстой.

2021 оны Ерөнхийлөгчийн сонгуульд нэр дэвшигчийг дэмжин ажиллаж, саналаа өгвөл хөгжлийн бэрхшээлтэй хүүхдүүдийг дэмжин ажиллах санамж бичгийг тухайн үеийн МАН-ын Нарийн бичгийн дарга, өдгөө ЗГХЭГ-ын дарга Д.Амарбаясгалан "Ээлтэй ертөнц" ТББ-ын тэргүүн Т.Туяажаргалтай байгуулжээ.

Энэ санамж бичиг 6 жилийн хүчинтэй хугацаатай төдийгүй бүр дахин сунгаж болох ч заалттай. Харамсалтай санамж бичигт хууртсан эцэг, эхчүүд дэмжин ажиллаж, саналаа өгсөн. МАН-аас нэр дэвшсэн У.Хүрэлсүх үнэмлэхгүй ялалт байгуулж Ерөнхийлөгчөөр сонгогдсон. У.Хүрэлсүх Ерөнхийлөгчөөр сонгогдож, Д.Амарбаясгалан ЗХЭГ-ын дарга болсон. Харин хөгжлийн бэрхшээлтэй хүүхдүүдийн хөдөлгөөн засах, эмчлэх, эцэг эхийг нь ажлаа хийх нөхцлөөр хангаж ажилладаг "Ээлтэй ертөнц" ТББ-тай хамтран ажиллахаар байгуулсан санамж бичиг нь гарын үсэг зурсан цаас хэвээр хадгалагдаж байна. 

Тэднийг "MCS Estates" ХХК 6 жил дэмжиж үйл ажиллагаа явуулах байраар хангаж байсан бол гэрээний хугацаа дууссан тул одоо үйл ажиллагаагаа явуулах газаргүй хүнд хэлбэрийн 0-30 насны хүүхдүүдтэйгээ/хэдий насанд хүрсэн ч тус хүүхдүүдийн сэтгэхгүй, биеэ авч явах байдал 3 настай хүүхдийнх шиг байдаг/ улс төрчдийн "тусална, дэмжинэ" гэдэг амлалтанд, санамж бичгүүдэд хууртаад байгаа бүхнээ дэнчин тавиад оёчихсон 29 мянган ширхэг зөөлөн тоглоомын шаглаа бэлдэцтэй хамт "гудамжинд" гарсан.

Дүүргийн Засаг даргаас эхлээд ЗХЭГ-ын дарга, Ерөнхийлөгч нь хүртэл "хуурчихсан" Ээлтэй ертөнц ТББ-ын хүүхдүүд болон эцэг эхчүүдэд Монголын маань сайхан сэтгэл ард түмэн минь тусалж "Ханни" зөөлөн тоглоомын "Шаглаа" бэлдэцийг худалдан аваарай хэмээн хүсэж байна. Манай check.mn сайт дэмжин, хандивын аян, эвэнт зохион байгуулахаар ажиллаж байна. Чаддаг, чаддагаараа нэгэндээ дэм тус болцгооё.

Хөгжлийн бэрхшээлтэй хүүхдүүдийн ээжүүдийн сэтгэл шингээн урласан "Ханни" зөөлөн тоглоомын "Шаглаа" бэлдэцийг худалдан авч "Ээлтэй ертөнцийг бүтээе" аянд нэгдэцгээе.
Нэг ширхэг нь 10.000₮
Данс: 419010306 ХХБ
Утас: 98853000