Одоо л нэг хавар болж байна уу гэмээр өдөр уртсаж, хурц нар цонхоор тусан гадаа ч тэр дотор ч тэр бүгчим халуун өдөр дуусах тийшээ хандаж нар хэдийнээ баруунаа хэвийсэн байв. Сурвалжилганд явсан сэтгүүлч, зураглаач хоёр буцаж ирэх үед тэднийг авч явсан  Нийслэлийн цагдаагийн удирдах газрын урьдчилан сэргийлэх хэлтсийн ахлах мэргэжилтэн, цагдаагийн дэд хурандаа Б.Алтанзулыг ажлын өрөөгөөр зочлонгоо аяга цай уухыг санал болгосон маань олон ажлын, уран бүтээлийн эхлэл болж, намайг урлагтай салшгүйгээр холбож продюсер болгох юм чинээ хэн санах билээ.
Б.Алтанзул дэд хурандаа үг, толгой холбосон цэцэн яриатай, өөдрөг, оргилуун хүсэл тэмүүлэлттэй, олон сайхан шүлгийг уран яруу унших төдийгүй урлагт үнэн сэтгэлээсээ хайртай. Ингэтлээ урлагт дурлаж, шатаж явдаг хүн яаж яваад цагдаагийн алба хаагч болсон учрыг сайн ойлгодоггүй ч сэтгэл зүрхний угаас огшиж, оргилдог мэдрэмжиндээ хөглөгдөж уйдах завгүй амьдардаг нь сайхан.
Одоогоос гурван хаврын өмнөх нэг өдөр ажлаар минь зочлоод гарахдаа уншсан "Миний ижий надаар л гоёдог" хэмээх шүлэг нь яруу хийгээд сэтгэлд ойрхон буусан тул "Би дүрсжүүлж өгье" гэдэг үг өөрийн мэдэлгүй уруул даваад гарчихаж билээ. Нэгэнт хэлсэн тул биелүүлэх үүрэгтэй тул эх үрсийн баярын өдрөөр клипийг олон нийтэд хүргэе гэж ярилцан тохиролцоод анхны клипний ажилдаа ханцуй шамлан орж төлөвлөсөн ёсоор 2020.06.01-ний өдөр www.check.mn сайтаараа дамжуулан үзэгчдэдээ хүргэсэн юм.

Эхний ажилдаа хоёр биенээ урамшуулан магтаж, дараа дараагийн олон уран бүтээлч санаа хөвөрч эхэлсний нэг нь Цагдаагийн байгууллагын түүхт 100 жилийн ойд зориулсан теле концерт байлаа.

Ковид-19 цар тахлын халдвар оргил үедээ тулж улс даяараа хатуу хөл хорионд орсон цаг үед гэртээ сууж байгаа иргэдийнхээ сэтгэлд, мөн хүндхэн нөхцөлд өргөсөн тангарагтаа үнэнчээр албан үүргээ гүйцэтгэж байгаа нийт бие бүрэлдэхүүнд дуу хуураар сэтгэлийн дэм өгье гэсэн Б.Алтанзул дэд хурандаагийн санаачилгыг Нийслэлийн цагдаагийн удирдах газрын удирдлага, Check media agency хамтран "Эх орны тангарагтай андууд-2" теле концерт болгон 2021.03.18-ны үдэш олон нийтийн хүртээл болгосон.

Б.Алтанзул дэд хурандаа "Бурхан хамгийн хайртай хүүхдэдээ Янжинлхам бурханы хишгээс хүртээсэн байдаг" гэж ярихдаа "Би Чингисийн Монгол" гэж байгаа мэт бахархалтай байдаг.

Угаас урлагт дуртай болохоор дэлгэцийн урлагт ч хүч сорино. Саяхандаа амралтын өдөр Фантастик продакшны Зура-2 буюу Цурам ажиллагааг үзэхээр буйдан дээрээ тухлан суутал кино эхэлмэгц нэг л танидаг хүн.
"Хүүе Зулаа ах байна шүү дээ" гэж уулга алдаад гэрийнхэндээ "Манай ах ш дээ" гэж нэг онгирчихоод тухлан киногоо үзсэнсэн. Түүний тоглосон кино зөвхөн Цурам ажиллагаагаар тогтохгүй бөгөөд Цагааны Баатар найруулагчаас үг сонсож, уран бүтээлд хамтран ажиллаж байснаа үргэлжид талархан ярина.

Ер нь урлагийн тухай ярихад нүд нь сэргэж, хийморь сэргэх шиг болдог доо. Урлагийн Янжинлхам бурханы ивээлд багтаж өдгөөг хүртэл хайр хишгийг нь харамгүй хүртэж яваа Б.Алтанзул дэд хурандаа халамжтай сайн хань, үлгэр жишээ аав, ах, дүү гэдэгтэй хэн ч маргахгүй байх. Завгүй амьдралын дундуур энд ч хэцүү, тэнд ч боломжгүйд бүдэрч, ажлын ачаалалд нугарч, урамгүй, урагшгүй, залхсан явахыг огт харж байсангүй. Нэг харахад шинэ уран бүтээл, эрдмийн цол хамгаалчихсан явдаг хөдөлмөрч гэж жигтэйхэн хүн. Ажлыг яг таг хийж, бүх зүйлийг цэгцтэй байлгах нь түүний төрөлхийн чадвар. Амнаас "а" үсэг гарсан бол бандан тас. Хийж л таараа. Болгох л болно гэдэг түүний эрэмгий занг зогсооно гэдэг угаас боломжгүй зүйл учир тэр санасандаа хүрсэн байх нь олон.

Монгол Улсын Соёлын тэргүүний ажилтан, Доктор, Дэд профессор, Цагдаагийн дэд хурандаа Б.Алтанзул ахыгаа Монгол Улсын Гавьяат жүжигчин, цагдаагийн хурандаагийн дайтай үнэлж, хүндэлдэг учир нь их энгийн. Зүгээр л зогсохгүй хөдөлмөрлөж, шалтаг тоочилгүй бүтээхийн төлөө чин хүсэл эрмэлзлэл, хүнийг хүнээр нь ойлгож хүлээж авдаг халуун сэтгэлд нь оршдог билээ.

Уйдах завгүй амьдарлаараа өөрийгөө чимсэн ах маань 2023.04.23-ны ням гаригт Монгол Улсын Соёлын тэргүүний ажилтан, ая зохиогч, дуучин, цагдаагийн ахмад Б.Буянаатай хамтран "Эх орны тангарагтай андууд" тоглолтоо UB palace-ийн концертын их танхимд тоглох юм байна.
Тоглолтын бэлтгэл ажлыг харж, сонсоогүй ч тэнд гал асаж, урам, хүсэл мөрөөдөл, халуун сэтгэл буцалсан сайхан тоглолт болно гэдэгт эргэлзэх хэрэггүй биз ээ.