Коронавируст халдварын үед "Коронавируст халдвар /ковид-19/-ын цар тахлаас урьдчилан сэргийлэх, тэмцэх, нийгэм, эдийн засагт үзүүлэх сөрөг нөлөөллийг бууруулах тухай" хуулиар төсвийн зарцуулалтад хяналт тавих, ил тод байдал бүрэн хаалттай болсон.

Энэ үеийг далимдуулж мөнгө угаах, зах зээлийн ханшнаас хэт өндөр үнээр бараа, бүтээгдэхүүн нийлүүлэх зөрчлүүд илэрснийг хэвлэлийнхэн нийтэлж, хяналт, шалгалт хийхийг шаардаж байв.

Ковид-19 цар тахлын үед алдар цуу нь мандаж олон нийтэд "од" болсон Дархан-Уул аймгийн Засаг дарга Б.Азжаргал ковидын үеийг алдалгүй ашигласан бололтой.

Түүнийг Зулзагын зуслан гэх газарт газар авч байшин барьсан. Тус байшингаа орон нутгийн хөгжлийн сангаас тохижуулсан. Ковидын хөл хорионы үед ах нь архи шаглаж зардаг байсан. Шагийн архи худалдаалсаар хөлжсөн гэх мэдээллүүд байдаг.

Түүнчлэн Дархан-Уул аймгийн 9, 10-р хорооны нутаг дэвсгэрт хоёр давхар хаус барьж, эрх мэдэл албан тушаалаа урвуулан ашиглаж өөрийнхөө байшинд дэд бүтцийг бүрэн шийдүүлсэн тухай эх сурвалж ярьсан юм.

Энэ талаар Дархан-Уул аймгийн Засаг дарга Б.Азжаргалаас тодруулахад "Энэ миний байшин мөн. 2018 онд 12 сая төгрөгөөр дэд бүтцийг бүрэн шийдүүүлсэн. 20 жил дарга хийчихээд 24 сая төгрөгөөр газар аваад байшин бариулчихаар бүгд ингэж харддаг юм. Би өөрийнхөө хөрөнгөөр өөртөө таарсан байшин барьсан гэж боддог" гэлээ.

20 жил дарга хийсэн хэмээн ярьж байгаа Б.Азжаргал даргын өөрийнх нь жилийн орлого 2017 онд 15 сая төгрөг байсан бол 2021 онд 110 сая төгрөг болтлоо өссөн байна. Мөн 2017 онд 75 сая төгрөгийн газар эзэмшдэг байсан бол 2021 онд 95 сая төгрөгийн үнэ бүхий газар эзэмшдэг болж нэмэгджээ.