Магадгүй энэ зуны хамгийн галзуу, гайхамшигтай, жинхэнэ бест тоглолтыг дуучин Укаг л үзүүлэх байх гэж итгэл төгс хэлмээр байна.  Учир нь   “Steppe Arena”-д  хоёр өдрийн турш тоглогдох тус шоуг  дэлхийн хэмжээний “од”-уудын амьд тоглолт ямар болдог, яг л тийм мэдрэмжийг өгөхийг тэмүүлж зохион байгуулж байгаа аж. Хамгийн гол нь тоглолт эхлэхээсээ өндөрлөх хүртэл аз жаргалыг түгээх, ая тухыг мэдрүүлэх эрхэм зорилготой.  Сүүлийн үеийн тайз дэлгэц, хөгжмийн техник тоног төхөөрөмж, аюулгүй байдал үйлчилгээг бүрэн хэмжээнд хангасан орчин нөхцөл, амьд хөгжим, аялгууг бүх л биеэрээ мэдрэх олон олон шийдлүүд УКАГИЙН ФЕНҮҮДийг хүлээж байна.  Сайн аав, халамжит нөхөр, хаашаа ч хамтдаа уриатай найз залуу, найз охин гээд хэн бүхэнд тоглолтын үүд хаалга нээлттэй.  Бүр бяцхан фенүүд, азай буурлуудаа ч бодолцож тоглолтын бэлтгэлийг хангаж байгаа гэх.  Ямартаа ч дуучин Укагийн алтан нар шиг гялтганах “шар зүрх”-нүүдтэйгээ уулзах мөч ойртсоор...

Угийн галзуу, доргио, галтай цогтой Укагаас “миний тоглолтод 8 настай балчираас 80 настай буурлууд ч ирж болно”гэдгийг сонсох сонин, бас таатай байлаа.

Ингээд хоёр жил гаруйн хугацаанд сонсогч, фенүүддээ хүлээлт үүсгээд буй дуучин Ука буюу Д.Уламбаяртай DANCE WITH ME тоглолтынх талаар цөөн хором ярилцлаа.

DANCE WITH ME тоглолт олон нууцыг дагуулсан гайхалтай тоглолт болох гээд байх шиг байна. Тоглолтынхоо талаар мэдээлэл өгөхгүй юу?

Юун түрүүнд энэ сайхан нартай өдрийн мэндийг хүргэе. Урлагийн салбарт хүсэл мөрөөдөл, зорилго тэмүүллээрээ 20 гаруй жил ажиллажээ. Урлагт дурлаж, шунаж ажиллах энэ хугацаандаа ирэх зургаадугаар сарын 10, 11-нд болох DANCE WITH ME тоглолт шиг гайхалтай шоуг хийх юмсан гэдэг хүсэл мөрөөдлөөр дүүрэн байсан. Харин өдгөө ийн биелэлээ олох гэж байгаад баяртай байна. Цаг үе нь болсон байна гэж үзэж байгаа.  2020 оны арваннэгдүгээр сард яг энэ хүсэл мөрөөдлөөрөө ажлаа эхлүүлсэн боловч цар тахлаас болоод тоглолтоо хойшлуулсан.  Тиймээс энэ тоглолтоо илүү мэргэжлийн түвшинд, өргөн цар хүрээтэй, тав тухтай орчинд хийхийг зорьж байгаа.

Дэлхий дахинд урлагаар дамжуулж хүмүүс хэрхэн соён гэгээрч, бие биендээ нөлөөлж, хайр түгээж байдаг юм бэ гэдгийг өөрийнхөө тоглолтоор дамжуулан харуулж чадна гэдэгтээ итгэлтэй байна. Энэ хүсэл, зорилго, төлөвлөгөөгөөрөө би тоглолтынхоо бүх консевцийг өөрчлөөд, баг бүрэлдэхүүнээ шинэчлээд ажиллаж байна.  Монголдоо хамгийн топ, нэр хүндтэй байдаг төдийгүй өөрийнхөө хүндлэл үзүүлдэг хамтрагч нартаа саналаа тавьсан. Бүгд маш таатайгаар хүлээн авсан байгаа. Хамтрагчдаараа бахархаж, нэр төрийн хэрэг гэж бодож байна.

Дэлхийн уран бүтээлчид хэрхэн яаж ажилладаг, ард нь ямар том баг бүрэлдэхүүн ажилладаг тэр жишгээр тоглолтоо зохион байгуулах гэж хичээж байгаа. Урьд нь маш олон зүйлийг орхигдуулж, ганцаараа зарим зүйлсээ зовж, жаргаж, мэдэрч  хийдэг байсан. Тиймээс энэ удаад ганцаараа бүх зүйлийг мэдрэлгүй яг мэргэжлийн хүмүүс, баг хамт олонтой ажиллаж, мөн дараачийн үедээ илүү гэрэлтэй, илүү мэргэжлийн зүйлсийг харуулж, , үлдээхийг хүссэн. Миний “мөрөөдлийн баг” гэж хэлж болох уран бүтээлчид маань тайзнаа хамт гарна.  Товчхондоо, өөрийн үлгэр дуурайлал авдаг, сонсдог, хүндэлдэг хүмүүсээ “тоглолтыг маань хөглөнө үү” хэмээн урьсан байгаа.

Тоглолт болох газар нь өөрөө их онцлог юм байна л дээ. Урд өмнө “Steppe Arena”-д бараг тоглолт болж байгаагүй байх?

Тайз дэлгэцнээс эхлээд бүх зүйл төгс байх ёстой. Гоё орчин, гайхалтай тоглолтыг хийх сэдлийг өгсөн газар бол “Steppe Arena” буюу мөсөн өргөө байсан.  Энэ өргөөрүү орох болгонд маш гоё цэнгэг уур амьсгал, үйлчилгээг мэдэрдэг. Мөн сэтгэл сэргээд өөр орчинд, өөр газар, өөр оронд байгаа юм шиг содон мэдрэмжийг төрүүлсэн болохоор тэнд хийхээр шийдсэн.  Бид бүгд нийлж аз жаргалтайгаар энэ тоглолтоо хийнэ. Энэ маркетинг, брендингээ тамгалж үлдээхийг хүсч байгаа. Тэр бүх зүйлийг маань гаргаж чадах газар бол “Brains storm” гэж бодсон.  Тэд саналыг маань маш аз жаргалтайгаар хүлээж авсан.

Тоглолтын бүх зохион байгуулалтыг би өөрөө хийж амжихгүй байсан. Учир нь VOICE MONGOLIA шоу нэвтрүүлэгт COACH-аар ажиллаж байгаа. Манай багийн оролцогчид маш амжилттай, авьяаслаг, ухаалаг оролцогчид байдаг. Тэднийхээ хүсэл мөрөөдлийг цалгардуулахгүйн тулд энэ ажлаа маш сайн хийх хэрэгтэй байлаа.  Тиймээс мөн VEP entertainment-д саналаа тавьсан. Тэд саналыг маань хүлээж аваад тоглолтын арын албыг хариуцаж байна. Гайхалтай сайхан байна.

Түүнчлэн, энэ бүх мэргэжлийн компаниудтай хамтарч ажиллахад хөрөнгө оруулалт маш чухал. Эхний саналаа “Story pay”-д тавихад, шууд зөвшөөрсөн. Ер нь энэ мэтээр ажил маань маш бүтэмжтэй, аз жаргалтай байна. Хүмүүс надад урам хайрлаж, намайг хийж бүтээж чадна гэж итгэл хүлээлгэж байгаад баярлаад ханашгүй.  Тасалбар борлуулах том ажлыг маань Shoppy.mn хариуцаж байна. Их хотын залуучууд бүгдийг төлөвлөдөг болсон. Үүнийг Shoppy.mn тооцоолж, төлөвлөж,  хариуцах болсонд талархаж байгаа.

Нэрийг маань лого аятай дагаж явах энэ бяцхан шар зүрхийг та бүхэн анзаарсан байха. Үүнийг миний охин зурсан.  Охин маань бал, цаас барьж авах бүртээ янз бүрийн зүрх зурж байдаг. Тэр нь надад гайхалтай мэдрэмжийг өгч чаддаг. Зүрх өөрөө дандаа гэгээлэг, сайхан юмыг мэдрүүлж өгдөг. Тэр ч утгаараа зүрхэн брэндинг үүсгэлээ.

Айл бүрт энэ “шар зүрх” шиг зүрх асаадаг хүн байвал тэр өрх тэр чигтээ өнгөлөг, гэрэлтэй болж хувирна.  Нар мандахын өмнө түнэр харанхуй байдаг. Гэхдээ нар мандана гэдгийг сануулдаг тэр зүрх, тэр гэрэл гэгээг хөг аялгуугаараа дамжуулж мэдрүүлэхийг хүсч байна. Ингээд 20 жилийн хугацаанд амьдралдаа мэдэрсэн, урлаг соёлоос авсан хамгийн сайхан бүхнээ үзэгч, сонсогчдодоо хүргэхийг тэсэн ядан хүлээж байгаагаа дахин тодотгон хэлье.