Ховд аймагт түлхүүр гардуулах нөхцөлтэй Багшийн хөгжлийн төвийн барилга барих тендер 2022 оны нэгдүгээр сард зарлагдаж хоёр байгууллага үнийн саналаа ирүүлсэн байна. Тус тендерт "Тэгш стандарт" ХХК 2 тэрбум 996 сая 105 мянган төгрөг, "Богоч констракшн" 2 тэрбум 716 сая 913 мянган төгрөг буюу 279 сая 192 мянга 308 төгрөгөөр хямд үнийн санал ирүүлж ялалт байгуулжээ. Үүнийг ялалт гэхээсээ илүү зорилго ёсоор тендерээ авсан гэх нь зүйтэй байх.

Хамгийн гайхмаар зүйл нь "Богоч Констракшн" компани тендерт ялчихаад Ховд аймгийн Жаргалан суманд барих түлхүүр гардуулах нөхцөлтэй 3 тэрбум төгрөгийн төсөвтэй хоёр давхар Багшийн хөгжлийн төвийн барилга барих ажлаа 2022.03.07-ны өдрийн 22/31 тоот албан бичгээр "Би Эм Жи Юу" гэх компанид шилжүүлсэн байгаа юм. Энэ үйлдэл нь тендерийн тухай хуулийг ноцтойгоор зөрчиж байгааг холбогдох шат шатны байгууллагууд харсаар байж нүд нь балай чих нь дүүргийн жишгээр гэрээг байгуулчихсан.

2022.03.14-ний өдөр байгуулагдсан БШУЯ/202212062 дугаар бүхий ажлын гэрээнд "Тендерт шалгарсан "Богоч констракшн" ХХК-ийн 2022 оны 03 дугаар сарын 07-ны өдрийн 22/31 тоот албан бичгэнд тусгагдсан гүйцэтгэгчийн эрхийг "Би Эм Жи Юу" ХХК-д шилжүүлэн өгсөн" тухай тодоос тод дурдчихаад байхад илтэд хууль зөрсөн заалттай энэхүү гэрээнд Ховд аймгийн Засаг даргын Тамгын газрын Хөгжлийн бодлогын төлөвлөлт, хөрөнгө оруулалтын хэлтсийн дарга Б.Баярсүх, ахлах мэргэжилтэн Б.Түмэндэмбэрэл, Жаргалант сумын Засаг дарга Ц.Цогтбаяр, Газрын харилцаа, барилга хот байгуулалтын газрын дарга Э.Дөлбадрал, тус газрын Барилга хот байгуулалтын хэлтсийн дарга З.Өмиртай нар жишим ч үгүй гарын үсэг зурчихсан байгааг харж байна.

Хэрэв тендэрт орж гүйцэтгэгчээр шалгарчихаад гүйцэтгэгчийн эрхийг өөр бусад компанид шилжүүлж болдог юм бол бүгд л ингэж дураараа аашилж, дунд чөмгөөрөө наргия л даа. Нэг компани бүх тендерт орж тендерээ бусад компаниудад шилжүүлээд байя.

Тендерт шалгарсан гэх "Богоч констракшн" компани нь 2013 онд үүсгэн байгуулагдсан Баатархүүгийн Нямчулуун, Баатархүүгийн Нямгэрэл гэх ах дүүгийн хамаарал бүхий этгээдүүдийн  компани.

Харин тендерийн тухай хуулийг зөрчин байж гүйцэтгэгчийн эрхийг шилжүүлж авсан "Би Эм Жи Юу" компани нь 2015 онд үүсгэн байгуулагдаж Баянзулын Визаяа, Гантулгын Баатарболд гэх хүмүүс эзэмшигчээр бүртгэгджээ.

Тус компани 2021.06.29-ний өдөр Ховд аймгийн алтай сумын Спорт заалны барилга угсралтын ажлыг гүйцэтгэх 1 тэрбум 159 сая 880 мянга 148 төгрөгийн үнэлгээ бүхий гэрээг байгуулж одоог хүртэл барилгын ажил бүрэн дуусаагүй байгаа. Гэрээнд зааснаар бол 2022.12.20-ны дотор бүрэн гүйцэтгэж дуусах ёстой байсан.

Гэтэл харуулж байгаа энэ зураг бол Алтай сумын Спорт заалны барилгын явцын 2023.02.15-ны өдрийн зураг.

Энэ зургаас хараад уншигч та барилгын явцыг сэтгүүлч надаар хэлүүлэлтгүй дүгнэж байгаа биз ээ.
Хуулийн дагуу бол өмнөх ажлаа 90 хувиас дээш гүйцэтгэлтэй хийж, холбогдох байгууллагын шалгалт, үнэлгээ ороогүй бол дараагийн тендерийн ажлыг гүйцэтгэх боломжгүй байдаг.  Өмнөх Алтай сумын Спорт заалны барилгын ажил нь явагдаж байгаа энэ үед өөр компанийн ажил гүйцэтгэх эрхийг шилжүүлэн авч байгаа нь  үүнийг харсаар, мэдсээр байж гарын үсэг зурж, санхүүжүүлэлтийг нь олгосон албан тушаалтнуудад хариуцлага яригдах ёстой.

"Би Эм Жи Юу" компанийн хувьд Алтай сумын Спорт заалны угсралтын ажлыг гүйцэтгэх гэрээ байгуулах үедээ гүйцэтгэх захирлаар Б.Визаяа, инженерээр Г.Баатарболд гарын үсэг зурж байсан бол Багшийн хөгжлийн төвийн барилгын гэрээнд инженер Б.Баатарболд нь захирал болон албан тушаалаа өөрчлөн гарын үсэг зурсан байгаа юм.  Угтаа бол төрийн болон орон нутгийн өмчийн хөрөнгөөр бараа ажил үйлчилгээ худалдан авах тухай хуулийн 41.2  Гүйцэтгэгч гэрээгээр хүлээсэн үүргээ гуравдагч этгээдэд шилжүүлэхийг хориглоно гээд заагаад өгчихсөн.

Харамсалтай нь төр, орон нутгийг төлөөлж байгаа албан тушаалтнууд тус хуулийн заалтыг мэдэхгүй гэхээсээ илүүтэйгээр зөрчиж гэрээ байгуулсан болохыг баримтууд харуулж байна. Өмнөх барилгын ажлын гүйцэтгэл нь бүрэн бус байгааг гэрээ байгуулах үед Ховд аймгийн Засаг даргын Тамгын газрын Хөгжлийн бодлогын төлөвлөлт, хөрөнгө оруулалтын хэлтсийн дарга харин одоо Ховд аймгийн Засаг даргын Тамгын газрын даргын үүргийг түр орлон гүйцэтгэгчээр ажиллаж байгаа Б.Баярсүх, ахлах мэргэжилтэн Б.Түмэндэмбэрэл, Жаргалант сумын Засаг дарга Ц.Цогтбаяр, Газрын харилцаа, барилга хот байгуулалтын газрын газрын дарга Э.Дөлбадрал, тус газрын барилга хот байгуулалтын хэлтсийн дарга З.Өмиртай нар хэрхэн тайлбарлах вэ? Төрийн сангаас гэрээний төлбөрийг шилжүүлэхдээ яагаад хянан, шалгаж гэрээг цуцлаагүй нь төрийн байгууллага ажлаа хэрхэн хийж буйн жишээ юм.