УИХ дахь АН-ын бүлэг мэдээлэл хийж байна. Бүлгээс УИХ-ын гишүүн Б.Пүрэвдорж гадаадад томилолттой, харин Ш.Адьшаа, А.Адьяасүрэн нар орон нутагт ажиллаж байгаа аж.

Хурлын эхэнд бүлгийн дарга Д.Ганбат “Гадаад өрийг үйлдвэрлэх явдлаа яаралтай зогсоо” хэмээв. Үргэлжлүүлэн УИХ-ын гишүүн С.Одонтуяа “Монгол Улсын гадаад өрийн асуудалд яаралтай арга хэмжээ авахгүй бол ноцтой байдалд очно. Засгийн газраас өрийн аргачлалыг тооцохдоо иргэдийг төөрөгдүүлсэн, буруу зүйл хэлээд байна. Дэлхийн банк Монгол Улсын өрийг ноцтой байдалд очсон байна гээд байхад манайх  санаа зовох хэмжээнд хүрээгүй гэдэг аргацаасан, хүн хуурсан юм хэлээд байна. Төрийн өмчийн компаниудын өрийг Засгийн газрын өрөнд тооцохгүй гээд явчихаж байгаа юм. Энэ бол буруу. Хурдан яаж өрөө барагдуулах вэ гэдгийг хамтарч шийдэх ёстой. АН-ын зүгээр төрийн өмчит компаниудаа хувьчилж, нээлтэй хувьцаат компани болгох боломжтой гэдэг байр суурьнаас хандаж байгаа. Эдийн засгийн аргаар хариу арга хэмжээ авч, аргачлалаа өөрчлөх хэрэгтэй. Хувийн компаниудаа дэмжиж, хувийн хэвшлээ зөв зүйтэй бодлогоор дэмжиж ажиллаачээ гэж хүсч байна. ӨРийн хавханд орсон орнуудын тоонд орчихсон яваа.

Эрүүгийн хянан шийдвэрлэх тухай хуулинд нэмэлт өөрчлөлт оруулах дээр маш олон ноцтой заалт байгаа. Үүнээс мөрдөгч гэдэг хүнийг нэмж оруулсан байгаа. Өөрөөр хэлбэл, мөрдөгч шийдвэрлэх ажиллагаанд оролцохдоо иргэнийг дуудан болон албадан ирүүлэх эрхтэй байхаар тусгасан байна. Энэ нь хууль сахиулагч өөрийн дур зоргоор авирлах боломжтой болгож байгаа юм. Маш аюултай заалт байна.  Товчхондоо, цагдаа болгон прокурор шүүхийн зөвшөөрөлгүй иргэдийг дуудаад байж болохгүй. Энэ бол хүний эрхийг ноцтой зөрчиж байгаа асуудал” хэмээв.