Засгийн газарт сайдын суудлын наймаа үе үе явагдах бөгөөд үүнийг дараагийн ээлж хоолондоо орж байна хэмээн жиг жуг хийдэг болсоор дасаж. Харин өнөөдөр хоёрдугаар ээлжнийхэн хоолондоо ороорой гээд Төрийн ордноор нэг орилсон өдөр өнгөрлөө. Олны хэл ам, сошиал дүүжлэлт дундуур “салхи сөрсөн” томилгоо хийгдэж, хэл ам, хараал дундуур гүрийсээр Монгол Улсын Засгийн газрын гишүүн, Монгол Улсын Шадар сайд бөгөөд  Эдийн засаг, хөгжлийн сайд Чимэдийн Хүрэлбаатар,  Монгол Улсын Засгийн газрын гишүүн, Эрүүл мэндийн сайд Содномын Чинзориг, Монгол Улсын Засгийн газрын гишүүн, Монгол Улсын сайд, Боомтын сэргэлтийн Үндэсний хорооны дарга Хүрэлбаатарын Булгантуяа, Монгол Улсын Засгийн газрын гишүүн, Барилга, хот байгуулалтын сайд Цэрэнпилийн Даваасүрэн нар тангарагаа ч өргөөд амжив.

Шинэхэн сайдууд дундаас хамгийн их шүүмжлэл дагуулж байгаа нь Барилга, хот байгуулалтын сайдаар томилогдоод буй Ц.Даваасүрэн юм. 2017-2021 онд Монгол Улсын Засгийн газрын гишүүн, Эрчим хүчний сайдаар ажиллах үеэс түүний улс төрийн нэр хүнд унаж эхэлсэн гээд хэлчихэд үнэнээс хол зөрөхгүй. 10 хувийн сайд гэдгээрээ илүү танигдаж, “шантаажчин” гэх цолыг албан ёсоор зүйх болсон ч ганцхан жилийн дараа сайдын сэнтийд буцаагаад залчихсан нь олны дургүйцлийг хамгийн их өдөөв.

“Ерөнхий сайдыг гуйгаад байхаар арга буюу сайд болж байна” хэмээн жишимчгүй ярьсан нь галан дээр тос нэмэхтэй адил цахим сүлжээн дэх түүний эсэргүүцлийг нэмэж орхисон ч гандан буурахгүй бололтой. Хуцдаг нохой гэх хочийг сошиалд зүүсэн Ц.Даваасүрэн сайдыг Орхоны хөндий болон Хөшигийн хөндийд шинэ хот байгуулах, нийслэл Улаанбаатар хотын гэр хорооллын хэсэгчилсэн дэд бүтцийг шийдвэрлэж, гэр хорооллын асуудлыг шинэ шатанд гаргахад Эрчим хүчний сайдаар ажиллаж байсан болон улс төрийн туршлагыг харгалзан үзэж сайдаар томилох үндэслэл болсон гэв.

Харин түүний талаар УИХ-ын Г.Амартүвшин “Ц.Даваасүрэн гишүүнийг сайдаар томилж байгааг хүлээн зөвшөөрч боломгүй асуудал гэж харж байна. Учир нь Ц.Даваасүрэн гишүүн хувийн шантаажийн улс төрөөр танигдсан. Бусад гишүүд рүү дайрдаг, доромжилдог, гүтгэдэг. Тэр ажлаа сайн хийсний үр дүнд сайд болж байгаа юм байна. Эрчим хүчний сайд байсан гэж байгаа. Эрчим хүчний хэдэн зээл нь Хөгжлийн зээл дээр ямар ч төлөлт байхгүй. Барьцаа хөрөнгө байхгүй. Төслийг удирдаж байгаа хэдэн хүний цалинг санхүүжүүлсэн зээл. Эрчим хүчний салбарт ямар ахиц гарсан юм бэ? Нэг ч цахилгаан станц баригдаагүй. Гадны хөрөнгө оруулалтыг байнга жадалдаг гишүүн ш дээ. Хөшигтийн хөндий гээд чухал төсөл байна. Хархорин хот гээд байна. Одоо энэ төслүүд эхлэхгүй, төсвөөсөө хэтэрнэ, хугацаа алдана, бүтээн байгуулалтыг явахгүй гэж би эмзэглэж, болгоомжилж байна. Ер нь бол Ц.Даваасүрэн гишүүн энэ Засгийн газрын, Ерөнхий сайдыг бүх юмыг эсэргүүцэж ирсэн.    Хөгжлийн банкны асуудал дээр л манлайлж бусад гишүүд, хүмүүс рүү дайрч орж ирсэн. Зээлдэгч нар нь зээлээ төлчихсөн. Гэтэл одоо хүртэл яллагдагчаар татаад явж байна. Төрийн өмчийн зээлүүд нь төлөгдөхгүй явж л байна. Тиймээс Ц.Даваасүрэн гишүүнийг Барилга, хот байгуулалтын сайдаар томилж байгааг буруу сонголт байна” хэмээн шүүмжилсэн.

Тус шүүмжлэл дотор Ц.Даваасүрэнг сайдаар томилох үндэслэлийг бүхэлд нь үгүйсгэсэн байгаа юм.

Хамт нэг ангид мөр зэрэгцэн “сурч” байгаа ангийхан нь түүнийг шантаажчин гэж хоолой мэдэн чарлаж байхад чаргууцалдсаар сайдын суудалд томилогдсоныг нь харин сошиалд хуцдаг нохойнд хошуувч зүүлгэлээ хэмээн эгдүүцэж байна.

Өнөөдрийн хэл амны бай, шүүмжлэлийг гол эзэн болсон Ц.Даваасүрэн сайд суудалдаа хэр удаан тэсэж, хуцдаг нохойг хэр удаан хооллох бол гэсэн бор шувуу хаа саагүй нисэж байгааг нүдтэй бүхэн харж, уншиж, үзсэн өдөр өнгөрч байна.