Нүүрсний хулгайн хэргийн мөрдөн шалгах ажиллагаа, хэргийн явцын талаар Хууль зүй, дотоод хэргийн сайд Х.Нямбаатар өчигдөр болсон Засгийн газрын хуралдааны шийдвэрийг танилцуулах үеэр дараах мэдээллийг өгсөн юм.

Тэрбээр "Хэргийн мөрдөн шалгах ажиллагааны талаарх дэлгэрэнгүй мэдээлэл надад алга. Цааш үргэлжлүүлж, тодорхой албан тушаалтнууд болон тэдгээрийн хамаарал бүхий этгээдүүдийг яллагдагчаар татаж байгаа. Хойшлуулшгүй журмаар баривчилж, цагдан хорьж, цагдан хориог сунгаж байгаа бөгөөд энэ чиглэлийн мөрдөн шалгах ажиллагаа үргэлжилж буй талаарх ерөнхий мэдээлэлтэй байна. 

Хэргийн мөрдөн шалгах ажиллагаа нь нэлээн олон хүнийг хамарч, өргөн хүрээнд явагдаж байгаа. АТГ, ЦЕГ-ын хамтарсан ажлын хэсэг саяхан Өмнөговь аймгийн Цогтцэций суманд ажиллаад ирсэн. Энэ хугацаанд 9,000 гаруй жолоочийг дуудаж асуусан. Монгол Улсын хилээр тээврийн хэрэгсэлтэй зорчихдоо тухайн тээврийн хэрэгсэлдээ нүүрс ачсан эсэх, хилээр хэдэн удаа гарсан гэх мэтчилэн асуудлыг тодруулж байгаа. Мөн өмнө нь тээвэрлэлтэд оролцож байсан хүмүүсийг хаягаар нь дуудаж асуух ажил үргэлжилж байна. Нөгөө талдаа санхүүгийн баримтуудад дүн шинжилгээ хийх ажлыг хийж байгаа.

Улс төрд нөлөө бүхий албан тушаалтнууд болон тэдгээрийн хамаарал бүхий этгээдүүдийг уг хэрэгт холбогдуулан шалгах ажиллагаа үргэлжилж байна. 

Мөрдөн байцаалтын зарим мэдээллийг олон нийтэд ил болгохгүй. Хэрэгт холбогдсон хүмүүсийн гэрт нэгжлэг хийх зэрэг мөрдөн байцаалтын тактикийн шинжтэй тодорхой ажлууд үргэлжилж байгаа" хэмээн хэлсэн.