УИХ-ын гишүүн Н.Энхболд: Яагаад энэ хуульд нэмэлт өөрчлөлт оруулах болов гэдэг анхаарал тавих асуудал. Аливаа юм шинэ, хуучин, уламжлалт дээр заавал зөрчил гардаг. Наадмаа хийж чадахгүй, морио уралдуулж чадахгүй байна гэдэг бидний буруу биш. Угаасаа шийдэж чадахгүй явсаар өдийг хүрсэн. Харин холбоод хоорондоо зөрчилдөөд байдгийг гайхаж байна.

Ц.Сандаг-Очир: Алслагдсан дүүргүүдэд баяр наадмыг зохион байгуулдаг байдлыг хэвээр үлдээсэнд талархалтай байна. Алдагдсан гурван дүүрэг аймагтай адилхан. Монгол үүлдрийн стандартад нийцсэн гэдэг зүйлээ тодорхой болгомоор байна. Хамгийн гол нь морь хэмжиж байгаа байдлаа ил тод, нээлттэй болго. Зургаан настан морийг яг гарахынх нь өмнө хүн болгонд ил тод харуул.

Хуул зүй, Дотоод хэргийн сайд Х.Нямбаатар: Хэрүүлгүй наадам хийе. 2023 ондоо морио хэрүүл уруулгүй, сэрвээнийх нь өндрөөр буюу өнгөрсөн жил баталсан стандартаар нь уралдуулчихая. Хатуу биет метр барьж зогсвол хэрүүл тасрахгүй. Төмөр зүйл дээрээс нь бууж ирэхээр морь цождог. Тэгэхээр төхөөрөмжөөр хэмжээд морио уралдуулчихая гэж үзээд байна. Цаашид цэвэр монгол морио уралдуулахад хугацаа хэрэгтэй. Үүний өмнөх зүйлийг л хуульчлаад өгөөч гээд байгаа юм.