Чуулганы нэгдсэн хуралдаан үргэлжилж байна. Хуралдаанаар  Банк бус санхүүгийн үйл ажиллагааны тухай хуулийн шинэчилсэн найруулгыг хэлэлцэж байна.

УИХ-ын гишүүд хэлэлцэж буй асуудлаар асуулт асууж, хариулт авч байна.

УИХ-ын гишүүн Д.Тогтохсүрэн: Өнөөдөр санхүүгийн зах зээл дээр зээлийн хүү маш өндөр байгаа. Энэ хэрээрээ иргэдэд дарамт болж байна. Банкнаас зээл авч чадахгүй байгаа хүмүүс банк бус санхүүгийн байгууллагыг зорьдог. Үндсэндээ, банк бус санхүүгийн байгууллагууд барьцаа хөрөнгө дээр босдог болов уу гэж би хувьдаа ойлгодог. Энэ хууль батлагдсанаар банк бус санхүүгийн байгууллагын зээлийн хүү буурах болов уу гэж бодож байна

УИХ-ын гишүүн М.Оюунчимэг:  Банкны шаардлага өндөр учир иргэд банк бус санхүүгийн байгууллагаас хүү өндөр зээл авдаг нь үнэн. Мэргэшүүлээд институт болгохоор хүү буурах байх гэж бодож байна. Мэргэжлийн түвшинд болгох зохицуулалт энэ хуулиар хийгдэж байгаа. Мөн банкны хүү буурч байгаа бол банк бус санхүүгийн байгууллагын хүү буурах боломжтой гэж үзэж байгаа. Банк бус санхүүгийн байгууллагын эрх зүйн зохицуулалт дээр Санхүүгийн зохицуулах хороо хяналт тавих нөхцлийг бүрлүүлж байна.

Санхүүгийн зохицуулах хорооны дарга Д.Баярсайхан:  Банкны үйл ажиллагааны зардлаас 2.5 дахин их зардлыг банк бус санхүүгийн байгууллага гаргадаг. Тэр утгаараа зээлийн мөнгөн дүн бага, хүү өндөр байдаг. Үе шаттайгаар хүүг бууруулах ажлууд хийгдэж байгаа. Үүнд хамгийн гол хүчин зүйл технологийн шийдэл гэж харж байна. Тухайн байгууллагын зардал буурахаар зээлийн хүү буурах боломжтой гэж тооцож байгаа.