Налайх дүүргийн наймдугаар хороонд угаарийн хийнд хордож  хоёр хүн амиа алдсан харамсалтай хэрэг өнгөрсөн сарын 10-ны өдөр гарчээ. Тодруулбал, өвөө нь ачтайгаа хорвоог орхисон эл хэргийг бид нэхэн сурвалжилсан юм.

Энэ талаар цагдаагийн байгууллагаас тодруулахад, 73 нас настай эрэгтэй Н,  15 настай эрэгтэй Д нь тухайн өдрийн 15.15 цагийн орчимд угаарын хийд хордож нас барсан. Хэргийг Налайх дүүргийн цагдаагийн хэлтэс шалгаж байгаа гэв.

Уншигч та бүхэн санаж байгаа бол нэг үе угаартаж нас барах явдал эрс ихэссэн. Үүнд албаныхан иргэдийг буруутгаж, стандартын бус зуух ашиглаж, галаа буруу түлснээс үүдэлтэй гэх элгийн юм яриад зогсож байсан цаг саяхан.Үүний дараахан дорвитой арга хэмжээ авч байгаа нэрийдлээр төсвийн мөнгөнөөс хэдэн тэрбум төгрөг гаргуулж галладаг айл бүрт утаа мэдрэгч гэх бага оврын төхөөрөмж байршуулсан. Тухайн үед нэр бүхий дарга нар ард иргэдийг угаартах эрсдлээс сэргийлэх, угаарын хийг хянаж байх бүрэн боломжтой төхөөрөмж гээд л “шахааны бизнес”-ээ ам хуурайгүй магтаж, сурталчилж байсан.

Гэвч  дээрх хэргийн тухайд утаа мэдрэгчээ тухайн айл байршуулж амжаагүй байсан гэх. Энэ  нь Налайх дүүрэгт  утаа мэдрэгч төхөөрөмжийг тарааж өгөх явц хангалтгүй, удаашралтай байгаагийн тод илрэл. Харин үүнийгээ дүүргийн удирдах албаныхан тендер, хил гаальтай холбон булзайруулж, бурууг өөрсдөөсөө холдуулахыг оролдож байгаа юм.

800 орчим сая төгрөгийн угаарын хий мэдрэгчийг Налайхын 7628 айлд суурилуулсан гэв

Засгийн газрын 313 дугаар тогтоолын дагуу өнгөрсөн наймдугаар сард Налайх дүүргийг агаарын чанарыг сайжруулах бүсэд шинээр хамруулсан байдаг. Энэ хүрээнд өнгөрсөн есдүгээр сарын 15-наас  тус дүүргийн айл өрхүүд сайжруулсан шахмал түлш хэрэглэж эхэлсэн байна.

Харин энэ үйл явцын дараа утаа мэдрэгч төхөөрөмжийн тендерийн үйл явц өрнөжээ. Дүүргийн Засаг даргын орлогч С.Тунгалагийн тайлбарлаж буйгаар хуулиндаа тендер сонгон шалгаруулалт нэг сар үргэлжлэх ёстой байдаг аж. Улмаар тендерт шалгарсан компани БНХАУ-аас бараа бүтээгдэхүүнээ оруулж ирэх гэж цаг алдсан. Яг ийм байдлаас болж айл бүрт утаа мэдрэгчээ байршуулж чадаагүй гэх хариултыг бидэнд өгч байлаа.

Өдгөө тус дүүрэгт угаарийн хийн мэдрэгч байршуулах шаардлагатай буюу гэр хорооллын галладаг  8600 орчим айл өрх байдаг. Эдгээрээс өнөөдрийн байдлаар дөнгөж 2000 айлд л утаа мэдрэгч байршуулж  чаджээ. Үлдсэн 3000 айлд тун удахгүй тараагдана гэж байгаа ч аль хэр хугацааны дараа айл бүр “ажилладаг, ажилладаггүй” утаа мэдрэгчээ байршуулж чадах нь  тодорхойгүй байгаа юм.

Дээрх тоон мэдээллийг бидэнд Налайх дүүргин Засаг даргын орлогч С.Тунгалаг өгсөн. Харин Агаар орчны бохирдлыг бууруулах үндэсний хорооны Ажлын албаны дарга Б.Алтанзул “Налайх дүүргийн 7628 айл өрхүүдэд угаарын хийн мэдрэгчийг суурилуулж буй. Энэ нь угаарын хийн хордлогоос иргэдийг шууд хамгаална. Хяналтын системийг бид өнгөрсөн жил бүрэн ажиллагаанд оруулсан. Тухайн цэг дээрх нэг айлд угаарын хийн мэдрэгч дугарвал албаныхан утсаар холбогдож, дуудлагын дагуу ажиллах юм. Хяналтын төвд том дэлгэцэн дээр угаарын хийн мэдрэгч суурилуулсан айл өрхүүдийг хянаж байгаа.

Налайхын айл өрхүүдэд монгол инженерүүдийн бүтээсэн жижигхэн дөрвөлжин хэлбэртэй угаарын хий мэдрэгчийг суурилуулж байгаа. Энэ жил 7628 айлд 800 орчим сая төгрөгийн угаарын хий мэдрэгчийг суурилуулсан” гэдэг зөрүүтэй мэдээллийг энэ сарын 08-нд нэр бүхий сайтад өгчээ.

Эх сурвалж: Хэрэг гарах өдөр Налайхын Засаг ноён албан өрөөндөө байгаагүй

Хамгийн аймшигтай нь эл хэрэг гарсны дараа НЗДТГ-ын Хэвлэл мэдээлэл, сургалт судалгааны албанаас  “Нийслэлийн Засаг даргын захирамжийн дагуу аравдугаар сарын 3-ны өдрөөс эхлэн Шуурхай штаб ажиллаж байгаа. “Таван толгой түлш” ХХК-ийн Хэрэглэгчдэд үйлчлэх албаны хяналтын нэгдсэн төвийн байранд албан хаагчид 24 цагаар үүрэг гүйцэтгэн ажиллаж байна. Одоогийн байдлаар Сонгинохайрхан дүүрэгт 33, Чингэлтэй дүүрэгт 14, Баянзүрх дүүрэгт 22, Сүхбаатар дүүрэгт 32, Баянгол дүүрэгт 10, Хан-Уул дүүрэгт 9, Налайх дүүрэгт 24, нийт 144 засвар, үйлчилгээтэй холбоотой дуудлага ирээд байна. Харин угаарын хийн хордлогын дуудлага, мэдээ ирээгүй” гэж мэдээлсэн байдаг.

Энэхүү мэдээллийг аравдугаар сарын 26-нд өгсөн. Харин дээрх хүний амь нас эрсдсэн хэрэг аравдугаар сарын 10-ны өдөр болсон.

Түүнчлэн, Налайх дүүргийн Засаг даргын орлогч С.Тунгалаг хэргийг аравдугаар сарын 13-нд гарсан гэж байгаа нь хоорондоо огт холбогдож өгөхгүй байгаа юм.

Ямартаа ч Хотын даргаас үүрэг өгөөд, шуурхай штаб ажиллаж байгаа өдрүүдэд нь энэхүү угаартсан хэрэг гарсан байдаг.

Манай сурвалжилах багийг Налайх дүүргийн ЗДТГ-ын байранд очиход Засаг даргын орлогч С.Тунгалаг уулзаж, хэрэг явдлын талаарх мэдээллийг он сарын зөрүүтэй, зарим тоон мэдээллийг учир дутагдалтай ийнхүү өгсөн. Харин Налайх дүүргийн Засаг дарга Ч.Раднаабазар ажлын өрөөндөө байсангүй.

Ташрамд хэлэхэд, тухайн угаарийн хийнд хордож амиа алдсан хэрэг гарах өдөр ч Налайхын Засаг даргын албан өрөө эзэнгүй байсан гэж эх сурвалж мэдээлсэн. Учир нь өмнөх өдөр нь баяр, тэмдэглэлт арга хэмжээнд уригдаад завгүй явсан гэх.  Гэвч орлогч дарга С.Тунгалаг нь Ч.Раднаабазар дарга тухайн өдөр ажлаа хийгээд явж байсан хэмээн хир халдаасангүй.

Ийнхүү бид угаарийн хийнд хордож харамсалтайгаар амиа алдсан өвөө, ач хүүгийн хэргийн мөрөөр явахад угаарийн хийн төхөөрөмжөөр айл бүрээ хангаж амжаагүй байгаа нэг дүүрэг, ажлын байрандаа тогтож суудаггүй нэг даргын хаалга л мөргөх шив. Хатуухан хэлэхэд, үхсэний хохь болиод л өнгөрдөг нэг жишиг.

Эл хэрэгтэй холбоотой сурвалжилга нэвтрүүлгийг ТУН УДАХГҮЙ хүргэнэ.