Дархан-Уул аймгийн "Оюуны ирээдүй" цогцолбор сургуулийн цайны газраас газ алдаж тэнд байсан 30 гаруй хүн эмнэлэгт хүргэгдсэн байна.

-Одоогоор амьсгал дутаад зүрх нь зогссон хүүхэд байхгүй-

Энэ талаар "Оюуны ирээдүй" цогцолбор сургуулийн холбогдох албан тушаалтнаас тодруулахад “3 дугаар цагийн завсарлагааны дараа сургуулийн нэг давхарт хүүхдүүд гэнэт ханиалгаад эхэлсэн. Хүүхдүүд хоорондоо юм дэлбэрч, цацарсан гэдэг зүйл яриад байсан. Завсарлагааны үе таарсан болохоор сургуулийн коридорт олон хүүхэд байж таарсан. Тиймээс бид сургуулиас яаралтай хүүхэд, ажилтан алба хаагчдыг гаргахыг хичээсэн” гэв.

Харин хордсон хүүхдүүдийн талаар аймгийн Нэгдсэн эмнэлгийн Ерөнхий эмчээс тодруулахад “Одоогоор амьсгал дутаад зүрх нь зогссон хүүхэд байхгүй. Эцэг, эхчүүд тайван байх хэрэгтэй. Бид бүхэн бүх боломжит байдлаараа ажиллаж байна” гэлээ.

-Урьдчилсан байдлаар гараараа цацдаг амьсгал боогдуулагч цацсан байх магадлалтай-

Аймгийн Засаг даргын орлогч Б.Жавхлан “Нөхцөл байдлыг сонсоод газар дээр нь ирж ажиллаж байна. Одоогоор хүнд хүүхэд алга гэж эмнэлгийн зүгээс мэдэгдсэн. Учир шалтгааныг тодруулахаар онцгой, цагдаа, тагнуул хийгээд холбогдох албаныхан ажиллаж байна. Урьдчилсан байдлаар гараараа цацдаг амьсгал боогдуулагч хүүхдүүд санаатай, санамсаргүй алдсан байх магадлалтай” хэмээсэн юм.

Хийнд хордож эмнэлэгт хүргэгдсэн хүүхдүүдийн эцэг эхчүүдийн зүгээс, “сургууль дээр химийн хор гаднаас л орж ирэх боломжтой. Санаатайгаар ийм зүйл болсон гэж бодож байна. Хүүхэд маань ханиалгаж, нүд нь загатнаж, хоолой нь эвгүй оргиж байна гэсэн.

Хүүхдүүдээс маш муухай эхүүн үнэр үнэртэж байна. Асар хүчтэй л зүйл байх шиг байна. Хүүхдэд тавих хараа хяналт муу байна.

Зарим нь оройтод 21.00 цагт тарж байна. Сургуулийн ойр орчимд эргүүл сайн ажиллуулмаар байна” гэх мэтээр байр сууриа илэрхийлж байна.