Засгийн газрын ээлжит хуралдаанаас гарсан шийдвэрийг танилцуулах үеэр ЗГХЭГ-ын дарга Д.Амарбаясгалан “Эрдэнэс Таван толгой”  ХК-нд тогтоосон зургаан сарын хугацаатай онцгой дэглэмтой холбоотой шийдвэр, мэдээллийг өглөө.

НҮҮРС ТЭЭВЭРЛЭЛТИЙН ХЭМЖЭЭ НЭМЭГДЭЖ БАЙГАА

Тэрбээр “Энэ оны эцэс гэхэд тус компани 500 сая долларыг татан төвлөрүүлэх үүргийг хүлээсэн. “Эрдэнэс Таван толгой”  ХК нь 16.5 их наяд төгрөгийн хөрөнгө, 3.4 тэрбум төгрөгийн өр төлбөртэй. Гэрээний урьдчилгаа гэж 2 их наяд төгрөгийг авсан байдалтай байна. Нийт 82 гэрээгээр нүүрс худалдаалан борлуулдаг. Үүнээс дөрвөн гэрээ нь оптек гэрээ байдаг. ” Эрдэнэс Таван толгой”  ХК-нд онцгой дэглэм тогтоож, гадаадын валютын урсгалыг нэмэгдүүлэх хүрээнд Боомтын сэргэлтийн үндэсний хороог өнгөрсөн долоо хоногт хуралдуулсан. Товчхондоо, бүрэн эрхт төлөөлөгчийн зүгээс тээврийн урсгалыг нэмэгдүүлэх, уртын болон дундын, богинын тээврийн уялдаа холбоог сайжруулж нүүрс тээвэрлэлтийн хэмжээг нэмэгдүүлэх хүсэлтийг тавьсаны үндсэн дээр тус хороо хурлаа хийсэн. Хурлаас 10 заалт бүхий тогтоол гарч, холбогдох албан тушаалтанд үүрэг чиглэл олгогдсон. Өөрөөр хэлбэл, уртын болон дундын, богинын тээвэр хоорондын уялдаа холбоог хангах, нөгөө талаасаа БНХАУ-тай холбогдож байгаа хил орчмын ариутгал халдваргүйжүүлэлтийн бүсийн үйл ажиллагаанд эрсдэл учрахгүйгээр зохион байгуулах чиглэлүүд өгөгдсөн. Энэ үүргийг Зам тээвэр, хөгжлийн сайд, УУХҮ-ийн сайд болон бусад холбогдох албан тушаалтанд албан даалгавар хэлбрээр хүргэгдэн ажиллаж байна.

Өнөөдрийн байдлаар  “Эрдэнэс Таван толгой”  ХК-иас Цагаан хад хүртэл өдөртөө 600 гаруй автомашины тээвэр хийгдэж, Цагаан хаданд буух нүүрсний хэмжээ нэмэгдэж байна. Бидний зүгээс Цагаан хаданд буусан нүүрсийг цаашаагаа хил гаргахад анхаарлаа хандуулах үүднээс БНХАУ-ын боомтын асуудал хариуцсан албан тушаалтантай яриа хэлэлцээр хийсний үндсэн дээр хил гаралтын тоо хэмжээг нэмэгдүүлэх тал дээр давхар арга хэмжээ авахаар ажиллаж байна.

Түүнчлэн, Засгийн газраас энэ оны төгсгөл гэхэд гадаад валютыг татан төвлөрүүлэх үүрэг хүлээсэн ” Эрдэнэс Таван толгой”  ХК, “Эрдэнэ үйлдвэр” ТӨҮГ, Монголросцветмет “ТӨҮГ , Эрдэнэс Силвер Ресурс ХХК зэрэг компаниудын валютын нөөцийг татан төвлөрүүлэх төлөвлөгөөтэй танилцаж шаардлагатай аж ахуй нэгжүүд дээр бодлогын дэмжлэг үзүүлж, тээвэрлэлт, олборлолт болон бусад үйл ажиллагаанд нь туслалцаа өгч ажиллахаар болж байгаа” гэсэн юм.

БИ 2 САРЫН ДОТОР 500 САЯ АМ.ДОЛЛАР ТӨВЛӨРҮҮЛЖ ЧАДНА

Үргэлжлүүлэн, "Эрдэнэс Тавантолгой” компанийн Бүрэн эрхт төлөөлөгчөөр томилогдсон Сангийн яамны ТНБД Ж.Ганбат “Намайг ажлаа авахад "Эрдэнэс Тавантолгой” компанийн уурхай дээр 20 орчим км газарт 500 гаруй автомашины цуваа нүүрсээ ачихад хүндрэлтэй байдалд байсан. Улмаар тухайн өдрөөсөө уурхай дээр бөөгнөрсөн тээврийн хэрэгслүүдийг бууруулах ажлыг эрчимтэй явуулсан. Ингээд 378 мянган тонн нүүрсийг уурхайгаас Цагаан хадруу тээвэрлээд цаашаагаа борлуулах ажлыг зохион байгуулсан. Улмаар өнгөрсөн аравдугаар сарын 26-наас буюу миний томилогдсон өдрөөс хойш 15.8 сая ам.долларыг Монгол Улсын төсөвт оруулаад байна. Энэ байдлаараа энэ ондоо багтаад Засгийн газраас өгсөн үүргийн дагуу 500 сая ам.долларыг оруулж ирэх бүрэн бололцоо байна гэж харж байна. Намайг ажил авахад "Эрдэнэс Тавантолгой” компани 200-300 орчим тээврийн хэрэгслээр 20-30 мянган тонн нүүрс экспортод гаргаж байсан. Харин долоо хоногийн дотор нийтдээ 657 тээврийн хэрэгслээр 74.8 мянган тонн нүүрсийг өдөртөө гаргалаа. Бид цаашдаа 500 сая ам.долларын валютыг оруулж ирэхийн тулд өдөртөө хамгийн багадаа 84 мянган тонн, сардаа 2.5 тонн нүүрсийг уурхайгаас Цагаан хадруу тээвэрлээд, экспортод гаргах шаардлагатай. Ингэж байж сард 250 сая ам.доллар буюу 2 сарын дотор 500 сая ам.доллар оруулж ирэх боломжтой болж байгаа юм” гэв.