Монголд анх удаа “Road to ONE-2022” тэмцээнийг албан ёсны эрхтэйгээр зохион байгуулж байгаа билээ. Уг тэмцээнийг STEPPE LINK Holding компани Road to ОNE Mongolia төслийнхөө хүрээнд Монгол ТВ телевизтэй хамтран зохион байгуулаад цөөнгүй хугацаа өнгөрсөн боловч үзэгчдийг байлдан дагуулж байна. 

ONE Championship-ээс зохион байгуулдаг “Road to ONE” тэмцээн нь Азийн улсуудын тулааны урлагийн шинэ залуу тамирчдыг нээн илрүүлэх зорилготой. Одоогоор зүүн Өмнөд Ази болон Азийн 10 гаруй улсад зохион байгуулагдаад байгаа бол Монголд анх удаа зохион байгуулагдсан даруй мянган, мянган үзэгчдийн хүсэн хүлээдэг нэвтрүүлэг болжээ. 

Энэ талаар Монгол ТВ телевизийн Гүйцэтгэх захирал Г.Бат-Эрдэнэ: -Монгол ТВ телевиз 12 жилийн хугацаанд олон арван нэвтрүүлэг бүтээж, үзэгчдийн хүртээл болгожээ. Дэлхийн хэмжээний томоохон шоу контент гэвэл энэ удаагийн контент нь 15 дахь нь болж байна. Бид 10 гаруй жилд олон улсын форматын дагуу голлох нэвтрүүлгүүдээ бүтээсэн. Энэ хугацаанд хуримтлуулсан туршлагаараа энэ удаагийн нэвтрүүлгийн бүтэц форматыг өөрсдөө бүтээж ажиллаж байгаагаараа онцлог болж байна. Ингэж нэг шат ахин ажиллах болсон нь бидний хувьд ололт юм.

Нөгөө талаасаа монголчууд байгалиасаа тулаанч зан чанар, өгөгдөлтэй ард түмэн. Өөрөөр хэлбэл, survival skill буюу тэмцэх чадвар өндөртэй байдаг. Манай цэрэг дайчид, тулааны спортын тамирчид энэ ур чадвар, хатуужил тэвчээртэй байдлаараа олон улсад үнэлэгдэж иржээ. Энэ өнцгөөс харвал монголчуудын эрэмгий байдал, давуу талыг тодотгон харуулсан спортын төрөл юм. Тиймээс энэ давуу талуудаа ашиглан Монгол холимог тулаанч дэлхийд гарах нь нэвтрүүлгийн эцсийн зорилго юм. Магадгүй 5, 10 жилийн дараа эргээд харахад Монголд холимог тулааны спорт олон улсын жишигт хүрч хөгжсөн байх бүрэн боломжтой гэж харж байгаа.

Эрхэм үзэгч та бүхэн уг нэвтрүүлгээ Монгол телевизээр болон цаг үеийн мэдээ, мэдээллийг Road To ONE Mongolia [RTO] - ҮЗЭГЧИД фэйсбүүк групп-т нэгдэснээр тухай бүрд нь хүлээн авч үзэх боломжтой гэдгийг онцлон хэлье.