Сангийн сайд асан С.Баярцогт өнөөдөр  Швейцарийн прокуророос хэргийг нь цагаатгасан талаар мэдээлэл хийх үеэрээ  улстөрд эргэн ирснээ зарлав.

Тэрбээр Монголын улстөрчид дунд ийм олон улсын хүчний байгууллагаар зэрэг зэрэг шалгагдсан улстөрч ховор гэж өөрийгөө тодорхойлов.

Мөн үргэлжлүүлэн, өмнө нь улс төрд 30 гаруй жил зүтгэхдээ Үндсэн хууль, Улс төрийн намын тухай хууль, нийгмийн асуудал, Сангийн сайдаар ажиллаж байсан хүний хувьд төсөв, эдийн засгийн бодлогын асуудалд маш их анхаардаг байсан. Ийм үйл явдал болсны дараа Монгол Улс 32 жилийн хугацаанд Үндсэн хуулиа төгс төгөлдөр төлөвшүүлж чадаагүй юм байна. Хууль засагладаг тэр хэлбэрт оруулж чадаагүй. Хүн засаглаж, хараат байсан юм байна гэдгийг олж харсан.  Тиймээс би улс төрийн цаашдын зорилтын хүрээнд хүний эрх, хууль засагладаг төрийн тогтолцооны төлөө ажиллана  гэв. Энэ нь улстөрд эргэн ирэлт хийж байгаагаа албан ёсоор зарлаж буйг илтгэх.

Ингээд түүний улстөрийн агуулгатай хэлсэн зарим үгийг дор онцолъё.

1. Монголын төлөө зүтгэсэн улстөрч болгон хувь заяаныхаа хувьд хэлмэгдэж ирсэн.
2. Хувь хүн хэлмэгдэж болох ч Монголын хувьд заяа төөрч болохгүй.
3. Би энэ үзэл бодлыг агуулж, хэрэгжүүлж явна.
4. Би хэн нэгэн хүнийг буруутгаж, хэлмэгдсэн гэж өрөвдүүлэх хүсэл сонирхол байхгүй.
5.  Монголын хувьд үүлэн чөлөөний нар шиг шинэ боломж гарч ирж байна. 
6.  Яг одоо монголчууд нэгдэж, эдийн засгаа сэргээж, сэргэн мандах боломж байна.
7. Би ил тод нээлттэй, баримттай ажиллаж байснаа бардам хэлж чадна.
8. Би улс төрийн үйл ажиллагаанд идэвхтэй оролцоно.