УИХ-ын Пүрэв гарагийн хуралдаан эхэллээ. Чуулган УИХ-ын гишүүд байр сууриа илэрхийлж, асуулт асууж хариулт авч байна.

УИХ-ын гишүүн С.Чинзориг  асуултандаа “Хөгжлийн төлөвлөгөөг боловсруулж, баталдаг болоод хоёр жилээ үдэж байна. Энэ төлөвлөгөө хоёр дахь удаагаа орж ирж байж сайжирсан юм алга. Засгийн газар, УИХ-ын бүрэн эрх дуусах дөхөж байна. 2023 оны жилийн төлөвлөгөөн дээр  олон чухал асуудал баймаар байна. Засгийн газрын үйл ажиллагааны хөтөлбөрийн хэрэгжилт хэдэн хувьтай байгаа юм бэ. Ирэх жил хэдэн хувьд хүргэхээр тооцож байгаа юм гэсэн асуулт байна. Жилийн төлөвлөгөөн дотор иргэдийн амьжиргааны түвшин, өрхийн орлого, ядуурлын байдал сайнгүй байна. Төлөвлөгөөнд томоохон бодлогын зүйл тусгагдаагүй байна. Тухайлбал, цалин хөлс, өрхийн орлого, ажил эрхлэлтийн байдлыг яаж дээшлүүлэх юм энэ бүгдийг тусгаж өгмөөр байна.  Ирэх жил ДНБ яаж нэмэгдэх юм бэ. Ялангуяа мал, аж ахуйн бүтээгдэхүүн дээр суурилсан боловсрох үйлдвэр байгуулах, хөнгөн үйлдвэр дээр анхаармаар байх юм. Сонгуульд орох болгондоо мал аж ахуйн бүтээгдэхүүнийг тогтвортой, үнэ цэнэтэй болгоно гэдэг ч ийм байдлаар яваад байх юм уу. Төрөөс гаргаж байгаа бодлого шийдвэр орон нутагт хэрэгжиж хүрэхдээ муу байна” гэв.

Сангийн сайд Б.Жавхлан хариулахдаа,  “Засгийн газрын үйл ажиллагааны хөтөлбөр маань 2022 онд 42 хувь байна. Ингээд 2024 оны сонгуульд орно гэж төлөвлөсөн байгаа. Нэгэнт  таван жилийн төлөвлөгөөг жил, жилд нь хуваагаад тавьчихсан байгаа тул төлөвлөлтөө жилээр нь 100 хувь гүйцэтгээд явах хэрэгтэй юм. Гүйцэтгэлд оролцож байгаа Засгийн газрын нэгж, агентлаг болгон дээр ирэх жил гүйцэтгэл яригдана. Энэ жилийн хувьд төсвийн гүйцэтгэлтэйгээ нарийн уяж тооцож төлөвлөлтөө хийсэн байгаа” хэмээв.